Duna Dios tur e gloria pa bo cas y henter bo famia, esey ta nifica cu bo ta reconoce cu sin yudansa di Dios lo bo no avansa ni tampoco logra bo meta , pasobra ta Dios ta duna bida y sabiduria, puro y berdadero pa asina nos por tin e victoria.
Santiago Capitulo 1 vers 5+6+7+8 Ta pa ra scirbi:
Ma si cualkier di boso tin mester di sabiduria, lage pidi Dios. Kende ta duna na tur hende generosamente y sin reproche y esaki lo wordo duna na dje.Ma lage pidi den Fe sin ningun duda, pasobra esun cu ta duda ta manera ola di laman, cu ta wordo lastra y tira door di biento .
Pasobra no laga e hende ey spera, cu e lo ricibi algo di Señor .
Siendo un hende di curazon dobbel inconstante den tur su caminda nan.
Esaki ta algo esencial pa tur mayor pasa over pa nan yiu, bisando cu Dios ta duna sabiduria na tur hende cu pidi, y E ta duna sabiduria gratis, y Dios su sabiduria, ta riba tur cos.
Bo no ta hañe bao di palo, ni tampoco den un sigaria di marihuana, ni tampoco den un botter di alcohol, pero bo ta hañe ora bo busca Señor cu un curazon arepenti, mustrando asina cu ta Dios mes bo mester.
Ta nos deber como mayor pa dirigi nos yuinan den E caminda di Dios pa asina evita mas tanto posibel cu nan por trompica ,sabiendo cu sabiduria ta e rikesa berdadero pasobra asina nos ta duna tur Gloria na Dios.
Hebreonan capitulo 12 vers 2 ta para skirbi: Cu nos wowo fiha riba Hesus e autor y cumplido di fe, Kende, pa motibo di e goso poni Su dilanti , a soporta e sufrimento di e cruz , sin haci caso di berguensa y a sinta na man drechi di e trono di Dios.
Dios su sabiduria ta kita tur berguensa for di nos, di tur locual por a pasa den nos pasado, e ta haci nos un criatura nobo den djE ( 2 Coritionan 5:17) caminda tur cos bieuw a pasa y a wordo haci nobo.
Hebreonan 7 vers 25 ta para skirbi: Pesey tambe E por salba pa semper esnan cu ta hala serca Dios, pa medio di djE como cu semper E ta biba pa intercede pa nan.
E Gloria ta di Dios, pasobra Dios merece tur e gloria, nada no ta di nos mes , tur cos ta di Señor.
E sabiduria di Dios ta esun cu nos mester pa guia nos yuinan, den e caminda di berdad y bida, pasobra mundo ta yena cu maldad den tur skina, y nos ta mira cu locual antes tabata wordo haci scondi , awor aki ta wordo aproba pa hacie den tur claridad.
Ta un berguensa cu temor di Dios cu a bay perdi , ta e causa di tanto cos abominabel y ridiculo cu hende ta haci, sin tene cuenta cu Dios y lubida cu nan curpa ta tempel di Dios..
Pero e sabiduria cu Dios ta duna ta, pa nos warda nos pianan lew for di caminda tin maldad, y no participa ni tampoco apoya, pasobra asina nos ta duna e Gloria na Dios..
Pasobra nos ta mira con e mundo ta bayendo den un direccion robez y rebelde cu ta separa nan mes for di Nos Creador, y dunando Gloria na Materialismo,y sin ningun berguensa ta apoya maldad.
Laga nos duna Gloria na Dios .