Ta ken of kico nos ta proteha?
Ta miedo di ken nos tin?
Ta na cual malbado nos debe respet of favor?
Ta ken lo denuncia for di unda e droga ta drenta y asina caba cu e horror, cu ta destrui Famia, Matrimonio y pone futuro di nos hubentud na peliger?
Situacion a sali for di man, ningun hende no ta denuncia, pero e situacion ta tristo, doloroso, penoso, ya no tin cuestion di edad, ni di hende grandi of mucha, tanpoco di homber of muher, ya no tin control ta kada ken ta pa nan cuenta.
Den cada bario cu bo pasa, tin un grupito of grupo ta bende y usa droga, riba caya hende ta move cu droga , manera ta respondi nan ta haci nan supermarket, droga ta wordo entrega na cas di hende manera pizza.
Ya no ta existi e berguensa mas di usa droga, caminda hende ta trafica, marihuana ta wordo cendi, y huma ta bolter.
Hende den auto bunita ta entrega droga na adicto.
E adicto ta cera su curpa den caha di carton den caya, pa e dal su pipa cu droga.
Adicto ta hala su droga, manera ta algo normal.
Y nos tin di wak bon pasobra e cantidad di adicto femenino, ta aumentando seriamente.
No ta cuestion mas di cierto bario, ni tampoco cierto hende, ta tur caminda, e uso di alcohol y droga a aumenta, si bo no ta kere, puntra e chines si su benta di alcohol a baha den cuaresma, y puntra e bendedor di droga si su benta a baha den cuaresma.
E maldad aki a escala y nos tur ta mira, ta solamente cu envolvimento di man di Dios , nos por wordo libra di e dolor aki.
Ta solamente si nos tur uni den oracion, y pone accion cuminsa denuncia e asunto aki di benta di droga, especialmente na hubentud, y tambe ban denuncia, tur hoben cu ta bende droga, pasobra droga cu arma tin e isla chikito aki domina. Pa cuanto tempo mas, hende lo sera wowo?
Ta ken lo carga nos economia si hendenan local cada dia ta envolvi nan mes mas cu droga y alcohol?
Pasobra si sigi manera cos ta bayendo aki,nos tin di busca hende di afo pa traha no pa motibo di profesionalismo, pero pa e motibo cu e nivel di nos hende local cu por traha a baha, door di uso di droga y alcohol.
E palabra Salud Mental ta wordo menciona den tur cos, pero ta parce manera nos ta lubida cu tin hopi caso di salud mental causa door di droga y alcohol.
Y tin hopi mucha cu problema di salud mental door di uso di droga y alcohol di parti di nan mayornan, hasta ora e mama tabata den embarazo.
Y awor si nos no uni den oracion y presenta dilanti di Dios nos clamor pa ayudo, ta ken lo yuda nos? Un caminda nos tin di cuminsa.
Di dia y anochi, dal un buelta den nos cayanan, bo por cuminsa for di Sero Colorado te cu Wespunt , y como ser humano awa lo yena bo wowo, ora bo mira cuanto yiu di mama ta envolvi, un decadencia, mucha muher bunita, y mucha homber jong, usando droga y bebiendo, tanto den localidad como riba caya, banda di tereno di deporte, bao di palo, den casnan bandona,y no lubida esnan cu nan mayornan ta permiti nan usa droga na cas.
Laga nos tur corda riba locual Señor Dios a bisa den 2 Cronicas 7:14, y perservera den oracion.
