Tin un tendencia ta bay rond cu e palabra di Dios ta anticua, y cu tin cosnan cu mester lo wordo cambia den dje, pasobra e no ta fit cu pensamento moderno, di cierto hende of grupo. Pasobra locual Dios ta exigi ta hopi fuerte, pa e bagamunderianan di actualidad por continua.
Cielo y tera por pasa ma e palabra di Dios lo permanece pa semper, Dios ta soberano y locual Dios ta bisa ta Pica ta Pica, y locual Dios aproba cu ta Su Boluntad ta keda Su Boluntad.
Ni maske cuanto cambio wordo haci aki na tera, por ehempel leynan cu ta wordo cambia mundialmente aprobando, inmoralidad sexual, impuresa, y abominacion esey no ta nifica cu Dios Su pensamento ta cambia den cielo, pasobra hopi hende sabi, te ainda no kier comprende, cu Dios ta soberano, y cu bida di hende ta manera hierba berde riba e mundo aki, un tempo e tey y despues e lo seca y caba na nada.
Locual si tur hende mester corda ta cu esun cu rechasa e Yiu di Dios, aki na tera lo wordo rechasa pa Su Tata cu ta den cielo. ( Mateo 10:32-33). No tin entrada na cielo, pa esun cu no ta kere den Cristo Hesus, esey ta para scirbi cu tur claridad den Juan 3:16-18, y cu un bon recordatorio den Juan 3:36.
Ningun hende no por cambia locual tin para scirbi den 2 Pedro 3:7 cu ta bisa;Ma e cielonan y e tera actual pa medio di Su palabra ta wordo reserva pa candela, warda pa e dia di huicio y destruccion di hendenan impio.( Mihor bisa tur esnan cu no ta kere den Cristo Hesus kende Dios a manda pa salba e mundo). Pero locual nos tur mester haci ta , aprecia locual Dios kier haci pa nos tur den 2 Pedro 3:9).
Ta bon pa nos encurasha otro, ta bon pa trece palabra di sabiduria y conocemento pa nos traha riba nos crecemento spiritual, pero crecemento spiritual sin santidad, no ta bal nada, pasobra e palabra di Dios ta bisa : Aspira pa tin pas cu tur hende y santificacion, sin cual ningun hende lo no mira Señor.( Hebreonan 12;14).
Hopi hende no ta notando cu nos ta saliendo for di locual hopi a yama Evangelio di Prosperidad cual ta hende a inventa, y cu nos ta drentando un epoca di Good looking Gospel,( Idolatria di hende),bisando cu algo ta bon pasobra pasobra cierto hende a bisa.
Pero e palabra nan ey semper ta para scirbi den Bijbel pa esnan cu ta medita den e palabra. Ningun hende por traha of construi riba otro fundeshi cu no ta Cristo Hesus , pero e mester wak bon con e ta traha, no halsando su mes, pero dunando tur Gloria na Dios.
Ningun mensahero no por ta mas grandi cu e mensahe y e mensahe ta Cristo Hesus, pasobra Dios ta soberano.
Ningun mensahero no por ta mas grandi cu e mensahe y e mensahe ta Cristo Hesus, pasobra Dios ta soberano.
Señor ta haci e conseho di nacionnan bira nada,E ta desbarata plannan di e pueblo nan. E conseho di Señor ta permanece pa semper. E plannan di Su curason ta di generacion, pa generacion.(Salmo 33:10-11.
Bendiciona ta e nacion cu su Dios ta Señor, e pueblo cu E a scohe pa Su propio herencia.( Salmo 33;12).
E enemigo a sembra mal simia den e cunuco ( Mateo 13:37-39), pero laga nos tur corda cu e enemigo no ta doño di e cunuco. Dios ta Soberano y doño di henter universo.