Nos ta bibando un temporada hopi serio di scuridad , e enemigo ta haci tur manera pa mantene hende den scuridad , inmoralidad, bruheria, malicia y abominacion.
Pasobra e apoyo duna na pica, ta birando dia pa dia mas grandi, apoyo duna na desobedencia na Dios, y falta di temor di Dios, ta grandi .
Locual ta para scirbi den 2 Timoteo 3:1-5 cual ta tempo trabahoso awor a bira visibel pa tur esnan cu kier mira, pero tambe e ta tempo di tristesa pa esnan cu ta stima Dios, y cu ta respeta Dios, y kier haci tur locual ta posibel pa mantene bon relacion cu Dios.
Ma Señor ta fiel, y E lo warda E lo fortalese y warda boso di e malbado.( 2 Thesalonisensenan 3:3).
Dios ta nos refugio y fortalesa, un pronto auxilio den tempo di angustia. ( Salmo 46:10).
Señor lo warda tur cu ta stime,ma tur e malbadonan E lo destrui.( Salmo 145:20).
Ta tempo pa aparta for di maldad y busca santidad, ta tempo pa aparta for di caminda di scuridad, huy for di tur perversidad, idolatria y busca Dios constantemente,den oracion y ayuno, pa asina nos por scapa for di e dia malo.( Lucas 21:36).
Nos tin di haci tur locual ta posibel pa predica e evangelio tur caminda, tur momento, pasobra ningun hende lo bay tin excuus ora Cristo Hesus mester presenta, pasobra Dios kier pa tur yega na conocemento di e berdad.
Locual pa hopi tempo a wordo profetisa awor ta bira realidad, cu nos lo drenta un tempo di sin respet pa Dios y su palabra, un tempo di scuridad inmenso, cual ya a cuminsa, caminda hende lo ta complaciente cu maldad, lubidando riba tur locual Dios a prohibi y ta stima nan mes mas cu Dios.( 2 Timoteo 3:1-9).
Un temporada cu segun apostol Pablo ta bisa cu hende lo ta ireconciliabel, pasobra nan a rechasa Dios, y nan ta complace cu maldad.Un tempo caminda tur esnan cu a nenga di reconoce Dios lo wordo expone di dia cla, pasobra na nan frutanan lo bo conoce nan.
Awor nos tur ta mira cu nos mester aumenta nos oracion, pa nos por pasa den e tempo aki, un tempo den cual ta dificil pa lanta bo yuinan sin Dios, un tempo caminda Cristo Hesus mester ta na prome lugar den bo hogar, pasobra sin Dios ta imposibel pa nos guia nos yuinan riba e caminda di berdad.
Hopi di esnan cu ta rechasa Dios, y kier sigi landa den e laman hancho di inmudicia y maldad, y ta nenga e riu di awa bibo cual ta Cristo Hesus.
Ta tempo pa nos perservera den Dios, haci lo maximo pa glorifica Su nomber pasobra nos unico speransa ta den Hesus nos Rey y nos Salbador.
No tene miedo pasobra mi ta cu bo,no desmaya pasobra Mi ta bo Dios. Lo mi fortalese bo si lo Mi yudabo.Lo Mi sostene bo cu Mi man drechi di husticia.( Isaias 41:10).
Señor su wowo nan ta riba su yuinan, Señor a priminti cu nunca e lo laga nos bandona, tampoco desampara. Señor ta nos defensor, E ta nos Salbador esun cu sa tur cos, esun cu lo bini pronto bin busca Su pueblo.Pesey nos tin cu keda alerta pa nos no cabisha, pasobra e dia ni e ora ningun hende no sa, pero nos tur ta na altura cu Cristo Hesus ta na caminda pa busca su pueblo.
Laga nos keda wowo cla y vigila, pasobra den tur e scuridad cu ta reina riba mundo aki Cristo lo presenta.