Pakico hende mester biba den rabia, odio, menosprecio, rechaso, discriminacion, inmoralidad, abominacion,amargura, violencia y falsedad , siendo cu Dios su amor ta grandi y su bondad y misericordia pa nos ta pa semper.
Pa hende haci bon, bondad mester biba den nan curason, pasobra for di un curason cu ta bon, bondad ta sali, y for di un curason cu ta malo, maldad ta sali.
Prome cu un hende haci malo cu otro, e mes mester wordo daña, pa asina maldad obra den dje, y e perde control y haci malo..Y hopi biaha hende inocente, especialmente mucha ta haña un trato cu nan no merece.
Ta masha importante, cu mayornan lanta nan yuinan cu amor,dedicacion, respet, y cu norma y balor halto, pasobra muchanan cu mira maltrato y violencia for di chiki, ta lanta pensando cu esey ta locual bida ta ofrece, pero nan ta completamente robes pasobra bida ta yena cu bondad pa esun cu kier haci bon.
Bondad y misericordia ta naturalesa di Dios, pasobra Dios ta e unico fuente di bondad, den e mundo aki, caminda maldad, inmoralidad y abominacion ta purba domina dia tras dia. E sistema di mundo, ta yena cu maldad, y hopi hende ta permiti esey domina nan mente y asina asocia cu scuridad.
Ora un grupo di mucha ta corre rond den auto, cu e meta pa bebe, droga, bringa , mata, horta, etc, bo ta haci bo mes e pregunta ta ki tipo di trip esey ta?. Acaso cosnan bon no ta wordo haci mas?
Mas ainda cu den e grupo ey bo ta haña a mucha muher sinta cu tin mas curashi, y un boca mas sushi, y cu ta mas cla pa bringa, cu e mucha hombernan , esey ta un puro demostracion, cu nos ta bayendo abao, den locual ta decensia,disiplina y coreccion, y cu e palabra di Dios no tey den cas.
Tin hopi cos cu politica ta wordo hunga cune, pasobra hende ta purba tur manera pa pasa nan responsabilidad riba otro y laba man, poniendo tur falta riba gobierno,scol,internet etc, pero ta lubida di papia di e bondad y amor cu mester sali for di nan mes pa nan yuinan.
Señor ta yen di gracia y compasion , Kende no ta rabia lihe, y ta grandi den misericordia. Señor ta bon pa tur, y Su misericordia ta riba tur su obranan, ( Salmo 145:8+9).
Señor ta bon y recto, pesey E ta instrui pecadornan den e caminda. E ta guia e humildenan den huicio y E ta siña e humildenan Su caminda.( Salmo 25:8+9).
Buscando e bondad y misericordia di Dios pa nos bida, nos lo conoce Su beneficionan.
** E ta pordona nos pica ( Mateo 6:12).
** E ta cura nos enfermedadnan ( Exodus 15:26)
** E ta redimi alma di su sirbidornan. (Salmo 34:22)
** E ta corona nos cu su amor y misericordia ( Lucas 15:11-24).
** E ta satisfase nos cu cosnan bon. ( Santiago 1:17).
E ta renoba nos hubentud manera aguila ( Isaias 40:31).
Dios ta grandi den misericordia y berdad, y ta un tristesa ora hende no kier reconoce e bondad di Dios pa nan bida, no kier acepta cu salbacion ta cariño di Dios.
Tur dia ora nos lanta for di nos cama ta momento pa gradici Dios, y usa e dia pa haci bon, proclama bon, y bendiciona otronan pasobra cada dia ta un regalo di Dios.
Den un tempo malo y trabahoso, laga nos percura pa haci, y imita Dios, pasobra Su Bondad y Misericordia ta pa semper.
1 comment
[…] Source link […]