E no ta nada bunita, e no ta pas den nos comunidad, e ta haci daño na e propio mucha . Tanto awe como majan, bringamento no ta di Dios, Dios no ta den asunto di odio y rabia. Dios ta un Dios di pas, pasobra Dios ta amor.
Pero nos tur tin cu corda cu si muchanan ta mira violencia constantemente den famia, especialmente ora nan propio hende di cas, ta dal otro, y nan ta mira bringamento for di chikito den nan cas, bo por spera un actuacion violento di nan parti riba caya, scol etc.
Pero awor bringamento di hubentud a bira algo, cu a sali for di man, enbes di muchanan busca algo positivo pa haci, hopi a cay bao di influencia maligno,y nan kier bringa, cana cu tur sorto di arma , tanto arma blanco, como arma di candela.
Y como maldad a aumenta rond mundo, informacion di violencia, y di arma a bira algo cu bo por haña tur caminda.
Pa hopi tempo wega politico a wordo hunga cuanto arma tin riba nos isla, pero awor nos ta mira mas cla cu nunca cu arma di candela potente y peligroso ta den man di mucha.
Den tur skina y caminda bo no por kere, por tin un hoben cu un arma di candela, pasobra esey ta e trend moderno. Pa falta di conocemento maldad y inmoralidad ta wordo imita.
Den Oseas 4:6 ta para scirbi: Mi pueblo ta wordo destrui , pa falta di conocemento.
Pasobra bo a rechasa conocemento,Ami lo rechasa di ta bo sacerdote.Como bo a lubida e ley di Dios, Ami tambe lo lubida bo yuinan.Mas nan multiplica , mas nan peca contra mi, lo mi cambia nan gloria den berguensa.
Poco poco nos ta mira locual a wordo profetisa miles di aña pasa tuma lugar, caminda mayornan no kier a tende di Señor, y asina nan yuinan a lanta sin e presencia di Dios den nan bida.
Pasobra muchanan cu tin Dios den nan curason, ta aleha nan mes for di tur sorto di violencia y arma,
Mescos cu e palabra den 2 Timoteo 3 : 1-4 ta mustra nos cu Dios su palabra ta berdadero, cu den e ultimo dianan lo bini tempo trabahoso, pasobra hende lo bira stimado di nan mes, arogante, desobedecido na mayornan,ireconciliabel,cu mala lenga,grosero, stimado di placer mas cu Dios. Stimado di placa mas cu Dios.
Nos tur su deseo ta pa nos yuinan tin e actitud di Cristo, pasobra esey ta e actitud,cu lo pone nan crece, decente, cu bon karakter y integro.
Pesey ta nos deber como mayor y no lubida cu e ta un mandato di Dios, pa nos lanta nos yuinan den disiplina y instruccion di Señor.
Nos tur sa cu karakter tribi, cabesura, caprichoso, curason cu no kier pordona, orguyo y inmoralidad, ta ataca nos hobennan constantemente.
Nos tur sa ken ta tras di esey, cual ta esun cu a bini pa horta mata y destrui, y nos mester haci oracion , pa asina wordo libra for di su gara.
Awor ta tempo, pasobra cada mayor mester ta responsabel pa su hogar y su yiunan, pasobra educacion ta cuminsa na cas. Ta for di cas e mucha mester wordo forma, den ordo y decensia, conociendo e balornan di di bida, lanta cu respet pa su mes, su mayornan, y pa comunidad completo.
Ta un berguensa y dolor pa mira mal comportacion di hobennan tanto mucha muher como mucha homber, nos ta pidi Dios tene misericordia.
Un suplica ta bay na henter nos pueblo, pa uni den oracion.