Den un mundo yena cu maldad, ta boluntad di Dios pa nos ta diferente, pa nos no ta mara na cosnan di mundo, pero pa nos ta sirbidornan di Dios, y disponibel pa tur bon obra cu Dios a yama nos pa haci.
Pasobra tur a peca y ta falta e gloria di Dios.( Romanonan 3:23).
Nos bida mester demostra un diferencia.
Nos actitud mester demostra cu nos ta yuinan di Dios.
Nos no por tin dos bida, pero solamente un bida cu ta agrada Dios.
Si nos a wordo lanta cu Cristo nos mester busca e cosnan di ariba, caminda Cristo ta sinta nan man drechi di e Tata.
Den un palabra bisa nos mester pone nos mente riba cosnan di ariba, pa nos ta un hempel y un testimonio di Dios su grandesa.
Pesey nos mester arepenti y tin un bida nobo den Cristo caminda tur cos bieu a pasa y a wordo haci nobo.( 2 Corintionan 5:17).
Orguyo,arogancia, pleito, odio y falta di pordon, mester bandona nos bida pa nos ta berdaderamenta cargado di e Gloria di Dios.
Inmoralidad y capricho no por wordo indentifica den nos bida, ni tampoco discriminacion y rasismo, pasobra esey ta cos nan cu nos mester aparta for di dje, como sirbi dor di Dios.
Tampoco nos ta yama pa nos ta para na banda di esnan cu ta apoya maldad y inmoralidad, manera hende cu kier tapa solo cu un dede.
Nos mester ta imitadornan y sigidornan di Cristo Hesus riba e mundo aki, nos mester tin mesun actitud cu tabata tin den Cristo Hesus. ( Filipensenan 2:5).
No solamente den palabra, pero den hechonan tambe.
Demostrando asina nos Fe, santidad, oracion y amor den tur momento.
Solo lo no ta bo lus mas,den dia,ni claridad di luna, lo no briya riba bo, pasobra Señor lo ta bo lus eterno, y bo Dios lo ta bo gloria.( Isaias 60:19).
Hesus a bise, mi no a bisa bo, si bo kere, lo bo mira e gloria di Dios.( Juan 11:40).
Ma tur esnan cu a ricibi’E, na nan e a duna e derecho pa bira yuinan di Dios, esnan cu ta kere den Su nomber. Cu no a naci di sanger, ni di boluntad di carni, ni di e boluntad di hende, ma di Dios.( Juan 1:12-13).
Pesey nos tin di haci oracion na Dios y bisa lo siguiente:
Bo ta bendiciona, O Señor, Dios di Israel nos tata pa semper y semper.
Di bo O Señor, ta e grandesa, e poder, e gloria, e victoria y e mahestad, di berdad, tur loke ta den cielo y riba tera, e dominio ta di Bo, O Señor.
Abo ta halsa Bo mes como cabes riba tur cos, y den Bo man tin poder y forsa, y ta den Bo man pa engrandese pa fortalesa cada un.
Pesey anto nos Dios, nos ta gradici Bo, y ta alaba Bo nomber glorioso. ( 1 Cronicanan 29:10-13).
Pasobra tera lo wordo yena cu conocemento di e Gloria di Dios, manera awa ta tapa laman.( Habakuk 2:14).
No a sobra tempo pa biba den dobbel animo, pasobra esun cu tin curason dobbel no ta util pa e trabao di Señor, un hende di curason dobbel ta inconstante den tur su obranan.
Ta tempo pa nos lanta ariba y para firme y haci un diferencia den e mundo coruptivo den cual diabel ta purba di tur manera pa ciega hende, y mantene nan den scuridad pa nan no mira e lus di Hesus.
Cu fe y humildad, nos lo vence.
