E contesta ta facil y logico, nan sa berdad, pero nan ta kere den mentira, pasobra e mentira ta yuda nan cubri nan maldad.
Mentira ta e cobertura di maldad, pasobra maldad a cuminsa cu un mentira, hincando hende den scuridad, pasobra nan a kere mentira.
Dia pa dia nos ta mira hende cu bon conocemento, bon studia y inteligente,ta biba bao di capa di mentira, ta defende mentira, y hasta ta busca otronan pa asocia cu nan den mentira.
Hende riba e mundo aki, ta prefera di scucha un mentira, y no pone atencion na e berdad, cu por libra nan alma pero ta prefera un mentira cu ta mantene nan de scuridad.
Bo por kere cu por yega asina leu cu gobernantenan por sostene mentira?
Bo por kere cu por yega asina leu cu gobernantenan ta sostene scuridad y yame educacion?
Bo por kere cu a yega asina leu cu gobernantenan ta apoya maldad y inmoralidad, alehando nan mes leu for di e caminda di Dios, y bira un piedra di trompica pa pueblo y adversario di Dios?
Tin cos spantoso cu ta pasa, cu un base amplio di mentira, y nos tur por mira con e tata di mentira cual ta satanas mes tin hende sabi, domina, mara, y ciega den nan capricho y duresa di curason ( Romanonan 2:5-6).
Yuda Señor, pasobra no tin hende deboto mas,pasobra e fielnan ta disparce for di meymey di yiunan di hende. Nan ta papia mentira cu otro cu lip cu ta labia y cu curason dobbel nan ta papia.
Cu Señor destrui tur lip cu ta gusta labia y e lenga cu ta gusta gaba.( Salmo 12:1-3).
Mentira a yega asina lew cu e kier transforma mente y fisico di hende, y hende ta somete na mentira, mas cu nan kier acepta e berdad.
Hende ta pensa y haci locual cu nan kier y kere cu Dios mester acepta nan forma di biba, enbes di nan somete na Dios su boluntad pa nan bida.
Tene cuidao rumannan pa no tin den ningun di boso un curason malbado y incredulo door di aleha for di e Dios bibo.( Hebreonan 3:12).
Romanonan 1: 28-32 ta demostra na nos tur kico ta pasa cu hende cu no ta reconoce Dios, y cu ta rechasa e plan di salbacion, den un palabra bisa nan ta rechasa Cristo Hesus cu su bondad y misericordia y prefera keda biba bao di capa di mentira y inmoralidad.
Ora hende no a haña necesario pa reconoce Dios, Dios ta entrega nan na un mente perverso pa haci cosnan cu no ta cumbini, y den e caso aki ningun hende no por bisa cu ta falta di otro hende pasobra ora Dios mes bira contra di bo, ningun hende no por yuda bo.
Lesa pa bo mes e cambionan cu ta bini den bida di hende ora nan ta rechasa Dios y kere den mentira: Nan ta yen di tur inhusticia, maldad,golosidad,perversidad,yen di envidia,matamento,pleito,engaño,malisia,nan ta hacido di redo,calumniado,odiado di Dios,grosero arogante,gabado , inventado di maldad,desobedecido na mayornan,sin comprendemento,inconfiabel,sin amor y sin misericordia.
Awor tur hende por tuma nota dicon tin hopi bida for di control, cu hende no ta compronde kico ta pasa cu nan.
Ta para scirbi den Juan 3:36 : esun cu kere den e yiu tin bida eterno,ma esun cu no obedece e Yiu lo no mira bida, ma e furia di Dios ta keda riba dje.
No ta tempo pa haci curason duro, pero ta tempo pa habri curason pa Dios y honra Su nomber.
