For di momento cu un pareha ta namorando, ta bon pa nan aserca otro den e parti spiritual cual ta oracion, pasobra eynan Dios ta saca tur cos na cla y asina mustra ken ta ken, for di principio.
Pasobra un hende mester tin Dios den su curazon, pa bo por drenta matrimonio cune, y hiba un bida agradadel. Y esaki no ta superficial pero di berdad e mester ta stima Dios,y abo.
Hende ta wak educacion ,tipo, trabao, auto,placa y bunitesa,cual ta importante, pero no ta tene cuenta cu e parti spiritual ora ta papia di namora y casa.
Ora bo casa boso ta bira uno dilanti di Dios , pasobra ta esey e palabra di Dios ta bisa pa cada homber y muher cu uni den matrimonio.( Genesis 2:24).
Mescos cu nos ta saca tempo pa tur cos nos mester saca tempo pa Dios.
Un dia tin 24 ora, awel sikiera un hora pa dia nos mester dedica na Dios,kende ta doño di tur cos.
Mateo capitulo 18 vers 19 Hesus ta bisa: Atrobe mi ta bisa boso, cu si riba tera dos di boso bay di acuerdo, tocante di cualkier cos cu nan pidi, esaki lo wordo haci pa nan door di Mi Tata cu ta den shelo.Como pareha , pone boso mes di acuerdo pa haci oracion, sea na rudia, para, of sinta.
Dios su palabra no ta cambia, E ta semper fiel, Su promesa ta berdad, Dios ta cumpli, y pa motibo di tur esaki nos por duna boso recomendacion pa bienestar Matrimonial y Familiar.
Oracion Hunto como pareha ta haci boso;
Reconoce Cristo Hesus como Rey y Salbador.
Humilde, y Dios ta stima humildad, y hunto boso lo logra boso meta.
E ta lanta boso nivel di Fe den Dios.
Dios ta mira boso como uno den tur cos.
E ta fortalese confiansa y intimidad den boso relacion matrimonial y cu Dios.
E ta cambia boso curazon y siña boso pordona.
E ta yuda tuma bon decision encuanto boso yiunan.
E ta yuda reconoce Dios como e unico recurso.
E ta trece bendicion den cas.
E ta un bon ehempel pa boso yiunan.
E ta siña boso pa vence maldad hunto.
E ta trece union den henter famia.
Mas boso ora hunto como pareha mas fuerte boso matrimonio ta: Pasobra un matrimonio ta un cabuya di tres cuerde, e homber , e muher y Dios.( Eclesiastes 4:9-12).
E enemigo nunca a gusta pa pareha ora hunto, pasobra tur cadena lo kibra.
Como pareha nos tin di ricibi instruccion di Dios pa guia nos yuinan, awendia tin hopi mayor ta laga internet haci nan trabao.
Segun nan tur cos e muchanan sa pasobra e muchanan ta Google, awor por ta hopi ta lubida cu Google no tin ningun yiu inscribi na Censo, pero ta nos como mayor ta keda responsabel, pa tur cos, y nos mester tuma tempo pa Dios y pa nos yiunan.
Nos ta bibando den tempo peligroso den cual nos relacion cu Dios ta primordial, pa nos bida permanece den bon direccion, pasobra tin hopi cos ta mustra manera bon, pero nan tras tin destruccion.
E encargo cu Dios a duna homber y muher pa forma un famia, ta algo sagrado y bendiciona, pasobra ta den nan man generacion y generacion mester pasa y sigui padilanti, haciendo bon y dunando tur honor y Gloria na Dios.
Tin un bendicion special ora un pareha ta uni den oracion dilanti di Dios.
