Desobedencia na Dios a bira algo masha normal, hende cu no tin temor di Dios, cu sa cu nan ta robes, ta persisti contra Dios su palabra y principio, nan ta reta Su autoridad. Y nan ta apoya hende pa nan desobedece Dios.
Tin hende grandi ta actua manera mucha chikito, nan sa cu un cos ta malo, y nan ta bira conformista y sigi tolera bagamunderia y engaño pa nan keda cu amistad cu hende.
Pero palabra di Dios ta siña nos cu ningun hende no por haci bofon di Dios, tur locual hende sembra nan lo cosecha.( Galationan 6:7-8)
Tene bon cuenta cu esaki cu tur locual wordo lanta of sembra den desobedencia na Dios lo no tin pas tampoco crecemento:
Un bida matrimonial den adulterio no tin pas tampoco crecemento.
Un persona cu ta biba den inmoralidad y abominacion no tin pas ni crecemento.
Un relacion contra palabra y principio di Dios, no tin pas tampoco crecemento.
Un yiu rebelde contra su mayornan no tin pas tampoco crecemento.
Un creyente cu bandona caminda di Dios y kier biba manera e kier lo no tin pas tampoco crecemento.
Un relacion den yugo desigual lo no tin pas tampoco crecemento.
Tur hende sa te na unda desobedencia a hiba Adam y Eva.
Dios a priminti Abraham un yiu, Sara su casa tambe tabata na altura, pero ora Sara su edad a subi,Sara a pone e promesa di Dios un banda y den desobedencia a manda Abraham bay traha yiu cu Hagar su cria.
E gran desobedencia di parti di Sara a trece desunion den nan hogar, pleito, cu nan mester a tuma e decision di manda Hagar bay. Y te hasta e dia di awe Israel ta den desunion y enemistad y cu varios pais pa motibo di desobedencia di un persona.
Pesey ora un persona ta desobediente na Dios, e no ta solamente afecta su bida pero e ta afecta bida di tur esnan cu ta rond di dje.
Ora mayornan ta biba den pica nan ta afecta bida di tur nan yuinan, tanto social, spiritual, y hasta fisico y financiero.
Jonas su desobendencia a afecta henter e barco di pagano cu tabata bay Tarsis, ta te ora nan a tire den laman tormenta a para, pero nan a sufri perdida, pasobra den nan ansha nan a tira carga for di e boto.
Tur locual wordo lanta a base di, desobedencia na Dios,sacrificando e berdad, pa mentira keda domina lo no prospera.
Pesey ora un hende coba un buraco pa su prohimo e mes ta esun cu lo cay aden.
Tin hende no tin gevoel, y hasta si nan tin di mata pa nan keda domina nan lo hacie, tene bon cuenta e politica cu ta wordo hiba den paisnan comunista, esey ta demostra na nos manera e palabra di Dios ta bisa cu e ladron a bini solamente pa horta, mata y destrui.
Siguramente e hende malbado lo no keda sin castigo , ma e desendiente di e husto lo wordo libra.
(Salmo 11:21).
Si boso ta dispuesto y ta obedece,boso lo come e mihor di e tera. ( Isaias 1:19).
Pakico boso ta yama mi Señor, Señor y no ta haci loke mi ta bisa ( Lucas 6:46).
Awor nos ta para dilanti un hubentud cu no kier obedece e palabra di Dios, pasobra hopi di nan no a wordo instrui den e caminda di Dios, esey ta nifica cu e falta no ta sinta solamente den e hubentud.
Pero cu fe den Dios nos lo sali pa dilanti.