Awendia hende kier imita tur cos, y kere den locual no ta berdad, y biba den fantasia , pasobra satanas ta doño di imitacion. E cos ta asina serio cu diabel ta pone hende imita un cos cu nan no ta, y hasta acepta, pretende y lucha pa un engaño, djis tira un bista riba e asunto di adicion y inmoralidad.
Anto ora ta trata di humildad, asina ora e ta hole falso, bo ta nota esey, pasobra humildad berdadero ta bini di curason y no for di boca, ni tampoco di un actitud extravagante pa hala atencion di hende, pasobra tur hende lo nota cu ta scondemento di orguyo tin. y nada di humildad.
Awendia e enemigo tin hopi hende gaña bao di e capa di maldad , cual ta pone nan aleha for di Dios su Palabra y su Principio y biba den scuridad.(Juan 3;20).
Pero humildad di curason tin beneficio extraordinario den presencia di Dios.
Proverbionan 11:2 ta bisa : Ora orguyo bini, deshonor tambe ta bin, ma sabiduria ta serca e humildenan.
Dios ta usa hende humilde ( Isaias 66:2)
Humildad ta prepara caminda pa gracia di Dios.(1 Pedro 5:5+6)
Humildad ta preveni furia di Dios. (2 Cronicanan 32:26)
Dios ta serca di e hende humilde, ( 2 Cronicanan 34:27).
Dios ta guia y siña hende humilde.( Salmo 25:9).
Dios ta halsa hende humilde. ( Salmo 147: 6).
Dios tin placer den hende humilde. ( Salmo 149:4)
Beneficio di hende humilde ta gracia di Dios. ( Proverbionan 3:34).
Humildad ta un mandato di Dios. (Santiago 4:6).
Dios ta scucha y responde hende humilde.( Daniel 10:12).
Hende humilde lo ta grandi den e reino di Dios.( Mateo 18:4).
E humilde lo wordo exalta.( Mateo 23:12);
Den Filipensenan 2:7+8 Hesus ta duna gran ehempel di humildad: Ma a bandona Su mes gloria,tumando forma di un sirbido, siendo traha den semehansa di hende.
Y hañando Su mes den condicion di hende E a humiya su mes, door di bira obedecido te na morto, esta morto na un cruz.
Ta hopi orguyo y mentira ta domina mundo, pero locual hopi hende ta lubida, cu orguyo no tin fundeshi, y ta facil pa un orguyoso cay, pasobra Dios no ta respalda nada caminda orguyo ta wordo pratica.
Ora algo crece haña fama pa medio di humildad falso y orguyo, asina berdad bini den su banda, e ta sinti su mes descubri y ta cuminsa lanta tur sorto di argumento pa sobrebibi, pero den Proverbionan 6:16-17 ta mustra cu Dios ta odia orguyo.
Orguyo ta un pica, cu ta pone hende rebeldia y lanta contra Dios, orguyo ta pone hende falta respet, y no tin temor di Dios,pasobra ora orguyo ta domina bida di hende ta nifica cu cu enemigo su presencia tey den e bida.
Ta existi orguyo positivo manera den deporte, studia na scol etc, pero asina e orguyo ta identifica su mes cu halsamento di bo mes, sin tene cuenta cu Dios, bo orguyo ta peligroso.
Tipo di orguyo asina ta lanta e ego di un persona y pone pensa solamente riba su mes y no ta tene cuenta cu interes di otronan, ni tampoco tin temor di Dios.( 2 Timoteo 3:1-9).
Dios ta spierta nos di esey pa e tempo cu nos ta bibando den dje awor aki ,cual ta tempo trabahoso.
Tur porta ta habri pa hende humilde di curason, tur oportunidad ta bon bini, pasobra Dios conoce e curason humilde, y un persona humilde ta stima door di Dios, y ta deseo di Dios pa usa e persona pa Su honra y gloria
