Den Efesionan 1:19-21 ta para scirbi: Y poder pa cu nos cu ta kere,segun e obramento di e forsa di Su poder, Cu E a eherce den Cristo , ora cu E a lant’E for di mortonan, y a haci’E sinta na Su man drechi den lugarnan celestial.
Mucho mas halto cu tur gobierno y autoridad, y poder y dominio, y tur nomber cu ta wordo menta,no solamente den e siglo aki, ma tambe den esun cu ta bin.
E a somete tur cos bao di Su pianan, y a dun’E como cabes riba tur cos na e iglesia, cual ta Su curpa , e plenitud cu ta yena tur den tur.
Pesey tambe Dios a hals’E te na e alturanan, y a dun’E e nomber cu ta riba tur nomber, cu pa e nomber di Hesus, tur rudia mester dobla, di esnan cu ta den cielo, y riba tera y bao di tera. Y cu tur lenga mester confesa cu Hesus Cristo ta Señor pa e Gloria di Dios Tata.
Ta masha peligroso pa reta of challenge Dios, pasobra esey ta mustra falta di conocemento spiritual y bobedad humano, pasobra simplemente den Su nomber tin poder pa domina tur cos.
Hende grandi ta bisa cu ora bo duna mucha un dede, mayan nan kier henter bo man. Hende ta papia sin pensa,y hopi biaha nan ta cay den nan mes trampa, ora nan cuminsa pensa cu nan ta Dios.
Ta un pensamento cu tin riba mundo, cu nos por tene Dios for di un asunto, pero locual ta sosode ta cu nos sa ora e cos ta contra Dios su boluntad, of ora e asunto tin mentira den dje , nos ta prefera haci cos riba nos mes.
Palabra di Dios ta siña nos;
Cu caminda dos o tres ta reuni den Su nomber, Dios ta mey mey di nan.
Cu tur locual nos pidi Dios den nomber di Hesus,E ta hacie pa nos.
Cu si riba tera dos hende bay di acuerdo tocante cualkier cos cu nan pidi, esaki lo wordo haci pa nan door di mi Tata cu ta den cielo.
Ora nos lanta y kere den e poder di oracion, nos lo mira, y conoce e poder di Dios.
Di berdad, di berdad Mi ta bisa boso, esun cu kere den Mi, e obranan cu Mi ta haci,e tambe lo haci, y obranan mas grandi cu esaki lo e haci, pasobra Mi ta bay serca e Tata.
Tur loke boso pidi den Mi nomber, esey lo mi haci, pa e Tata wordu glorifica den e Yiu. Si boso pidi algo den mi nomber lo mi haci’E.
Cristo Hesus kier laga nos sa, cu no tin nada cu nos pidi y kere, cu e no por haci pa nos, pasobra E tin tur autoridad, y su autoridad ta mas halto, pasobra solamente Cristo por calma tempestad.
Solamente den e nomber di Cristo Hesus enfermedadnan ta wordo sana, y hende ta wordo libera, for di cadena di satanas.
A yega momento pa tur hende realisa cu e nomber di Cristo Hesus ta e nomber riba tur nomber, y tur e esnan cu ta kere den su nomber, lo haci cosnan grandi, y nan lo vence tur adversidad den Su nomber.
Hesus a hala serca y a papia cu nan bisando: Tur autoridad a wordo duna na Mi den cielo y riba tera.
Pesey ta tempo pa nos tur para firme y kere den Su nomber, pasobra den e nomber di Cristo Hesus tin poder, y Su compasion y misericordia ta grandi pa nos.