Siete shen y cincuenta aña prome cu Hesus a nace e profeta Isaias a profetisa bisando: Pesey Señor mes lo duna boso un señal . Mira un birgen lo sali na estado, y lo haña un yiu homber y e lo dune e nomber Emanuel.( Isaias 7:14).
Pasobra un yiu homber a nace pa nos , un yiu homber ta duna na nos, y e gobernacion lo ta riba Su schouder. Su nomber ta Consehero Maraviyoso, Dios Todopoderso,Tata Eterno,Prins di pas. Lo no tin tin fin na e aumento di Su gobernacion y di pas,riba trono di David y riba su reino pa establese esaki y mantene cu huicio y husticia, for di e tempo ey y pa semper.E zelo di Señor di ehercitonan lo haci esaki. ( Isaias 9:6-7).
E dia ,fecha y e luna di nacemento, y tur e otro cosnan commercial manera kerstboom, adorno, etc y e ham di pasco no a wordo menciona, pero un cos nos tin sigur cu e palabra di Dios duna na Isaias a cumpli completamente.
Locual Dios a bisa a sosode, y awe nos tur tin Pasco den nos curason, pasobra nos tur tin cu corda cu locual Dios bisa ta cumpli.
Y no solamente esey pero Dios a papia bon cla cu nos ken Hesus lo ta: Awor un Spreit lo sali for di e troncon di Isai y un Rama for di su raisnan lo carga fruta.
Spirito di Dios lo keda riba dj’E, e Spirito di sabiduria y comprondemento,e Spirito di conseho,y poder, y e Spirito di conocemento y temor di Dios.( Isaias 11:1-2).
Lucas 2 : 40 ta confirma esey ,pasobra ta para scirbi: y e Mucha tabata crece y bira fuerte y a wordo yena cu sabiduria, Y e gracia di Dios tabata riba dj’E.
Tur locual e angel a anuncia na Maria a cumpli, pa nos tur por mira cu Dios tin poder pa medio di Su Spirito Santo pa laga un baby, wordo concebi den barica di un birgen , y e lo duna lus na un yiu homber, y lo bo yame Hesus .( Lucas 1;31).
E grandesa di nos Pasco ta e grandesa di nos salbacion, ta nos Salbador a nace,esun cu a bini na mundo y a muri pa nos picanan, pa ken cu kere den dj’E lo tin bida eterna.
No tin nada mas grandi , ni nada mas poderoso, cu nacemento di nos Rey y Señor kende ta Hesus, den Su nomber tin tur poder y tur autoridad.
Pasco ta fiesta di amor y pas, fiesta di reconciliacion,fiesta caminda nos tur ta pordona otro di curason, y biba bon cu otro.
Nos Pasco di nacemento, caminda nos ta recorda nacemento di nos Rey y Señor, no por wordo identifica cu paranda, buracheria, droga, violencia y inmoralidad, pasobra Hesus ta e prins di pas.
Despues cu Maria a bishita su prima Elisabeth ( Lucas 1:39-45) y a wordo confirma pa medio di Spirito santo di Dios cu Maria ta na estado.
Maria a canta un cantica na Dios. bisando; Mi alma ta engrandese Señor y mi spirito ta regosiha den Dios mi Salbador. Pasobra E a mira e estado humilde di Su sirbiente, pasobra mira for di awor tur generacion lo yamami bendiciona.Pasobra Esun Poderoso a haci cosnan grandi pami y santo ta su nomber.
Nos celebracion di Pasco di Nacemento, ta algo cu mester wordo celebra den cada curason cu ta stima Dios, pasobra ta Dios mes a manda su unico Yiu pa nos.
Laga nos gradici Dios.
