*** Laga nos bati alarma pa tur hende sa, cu Cristo Hesus ta nos unico fundeshi berdadero.
***
Cristo Hesus ta E caminda di berdad y bida, cielo y tera lo pasa ma Su palabra lo no pasa.
Evita di asocia bo mes cu organisacion caminda bo sa cu Su nomber no ta wordo aprecia, caminda bo sa cu Su palabra y Su berdad no ta wordo reconoce .
Tene bon cuenta, pasobra tipo di organisacion asina, ta hiba hende na rechaso di Dios.
E ta tristo pa bisa pero hopi hende ta bay tras di material y posicion y asina cay for di e caminda berdadero, pasobra Cristo Hesus ta e unico mediador entre Dios y hende.
Ningun hende no por salba ningun hende, ningun hende no por para den lugar di Dios, pa bo bida.
***E cobertura di mas grandi cu hende por tin ta Cristo Hesus como cabes riba tur cos (Filipensenan 2:9-11) .
*** E Sanger di Cristo cu ta laba nos tur for di pica y inhusticia.(1 Juan 1:9).
*** Y e Spirito Santo di Dios cual lo siña nos tur cos y hiba nos den e presencia di Dios.(Juan 14:15-21).
*** Ban pone tur cos terenal y temporal un banda y gara na locual ta puro y berdadero y eterno.
Apostol Pablo a bisa den 1 Corintionan 3:10-11).Segun e gracia di Dios cu a wordo duna na mi, mi a pone un fundeshi manera un architecto sabi, y un otro a traha riba dje,
Pasobra ningun hende no por pone otro fundeshi , cu ta esun cu ta poni caba,cual ta Hesus Cristo.
Ma awor den Cristo Hesus, boso kendenan antes tabata leu a wordo treci serca pa medio di e Sanger di Cristo.( Efesionan 2:13).
Tin hopi organisacion cu ta lantando rond mundo y ta busca pa recluta mas mucha posibel, pa daña nan mente y nan curason.
Treciendo famianan na peliger, pasobra hopi hende ta pensa cu solamente bom nuclear y malesanan por haci daño.
Pero diabel tin su agentenan, bon scondi den poblacion, cu ta papia bunita cu hubentud,
pero otro banda nan ta supla candela di fierno riba e muchanan, y asina nan ta lanta rechasando Dios, su mandamento y principionan.
Ya na cierto parti di mundo ta pasando leynan cu muchanan no tin mester di autorisacion di mayor, cu nan por actua riba nan mes y tuma nan mes decision.
Bayendo contrali na e palabra di Dios cu ta bisa den Efesionan 6:1-4 kico un mucha y su mayornan mester haci pa agrada Dios.
Señor ta mi baranca, y mi forti, y mi libertador,mi Dios, mi baranca,den kende mi ta tuma refugio, mi escudo y e cacho di mi salbacion.mi toren halto. ( Salmo 18:2).
Nos tin di para keto un rato y pensa y reflexiona den ki direccion, nos kier pa nos yuinan bay, y para firme contra tur bagamunderia cu ta purba tur dia mas y mas di distancia nos yuinan for di Dios.
Tur mayor responsabel ta traha duro pa cria nan yuinan, esey ta deber sagrado di tur mayor.
Pero como mayor nos tur ta yama pa no neglisha, displina, coreccion y un bida spiritual adecua pa nos yuinan.
Obedencia na Dios mester por wordo mira door di nos yuinan, den cas, pasobra mayornan mester expresa obedencia na Dios, na prome lugar, pa asina nan ta berdadero mentor di nan yiu.
Nos ta den un situacion serio caminda nos mester demostra cu pensamento, hecho y actitud, cu Cristo Hesus ta nos unico fundeshi, tur otro fundeshi di idolatria ta falso.
