Awor ta bon pa tur hende sa ken ta esnan cu ta perdi?
Nos tur tabata perdi pasobra nos tur a peca, Romanonan 3:23 ta para scirbi: Pasobra tur a peca y ta falta e gloria di Dios.
Aki nan nos tur tin di comprende cu Cristo a bini pa salbacion di tur hende, pasobra Dios a stima e mundo.(Juan 3:16).
Awor e salbacion nos ta ricibi pa medio di gracia (Efesionan 2:8-9), ningun hnde no por haci nada riba nan mes pa nan wordo salba, ta un cos a keda nos tur, ta di kere den Cristo Hesus y wordo salba.
Juan 3:16 ta duna nos e bon noticia di e plan di salbacion , pero Juan 3;36 ta splica nos claramente kico ta pasa esnan cu a tende y a rechasa.
Tin hende ta kere cu nan ta biba asina lekker, asina comodo, cu nan no ta worry cu nan salbacion, cada biaha cu e palabra di Dios yega serca nan pa nan arepenti y entrega nan bida na Cristo, nan ta pospone e oportunidad usando yen di excuus barata.
Pero bijbel ta splica nos cu ta dos caminda tin sea cielo of fierno, bo por pasa bida eterno den cielo of morto eterno den fierno y esey por sosode segun cada ken scohe.
Ta hopi cherchado y hacido di bofon ta cana rond, hopi cu ta rechasa e palabra, hopi cu ta kere cu ora nan rechasa e palabra di Dios, ta e hende cu a trece pa nan , nan ta rechasa ,sin sa cu ta Dios mes bo ta rechasa ora bo rechasa Su palabra.
Pesey Mi a bisa boso, cu boso lo muri den boso picanan, pasobra si boso no kere cu ta Ami ta E,boso lo muri den boso picanan.( Juan 8:24).
Pasobra e Yiu di hende a bin pa busca y salba loke tabata perdi ( Lucas19:10).
Den Revelacion 21:8 ta para scirbi cu e incredulo lo no drenta cielo, esaki ta nifica cu nos pica, por wordo pordona si nos ta kere den e Yiu unigenito di Dios, y asina nos por alcansa cielo, pero si nos no ta kere den e Yiu unigenito di Dios e ora ey si porta a sera pa nos.
Pasobra tur rudia mester dobla y tur lenga mester confesa cu Hesus Cristo ta Señor pa gloria di Dios Tata.
Tur esnan cu ta bisa cu no tin Dios, pa asina permanece den nan inmoralidad, malicia y maldad lo cosecha fierno como nan ultimo adres.
Awor nos por sondea pa nos mes cuanto necesidad nos tin como mayor pa dirigi nos yuinan y nos nietonan riba e caminda di Dios, cual ta e unico caminda di berdad y bida, pasobra mas nos tarda, nos ta poniendo nos yiu na peliger, pasobra ningun hende sa e momento y e dia cu Cristo Hesus lo bini.
Nos no por biba manera nos kier,y nos no por sirbi Dios con cu ta, pasobra Dios ta santo y Dios ta biba den santidad. Nos mester agrada Dios, pasobra nos ta su yiunan, y un bon yiu semper lo agrada su mayornan.
Pesey ta hopi tristo mira hende peca boluntariamente of pusha otro den pica y abominacion, sabiendo cu nan ta totalmente contra Dios, pasobra esey ta nifica cu temor di Dios no tey mas.
Cristo Hesus a bini pa busca y salba esnan cu ta perdi , esnan cu ta anhela e misericordia di Dios den nan bida.
Nos mester hala serca Dios, pasobra tempo ta malo y trabahoso y yena cu inmoralidad.