Filipensenan 3:13-14 ta para scirbi: Rumannan mi no ta pretende cu mi mes a gar’e caba ma un cos mi ta haci: Lubidando loke ta keda atras, y aspirando na loke ta dilanti, mi ta haci tur mi esfuerso pa alcansa e meta, pa haña e premio di e yamada celestial di Dios den Cristo Hesus,
Ora un hende ta desea na madura den Señor , na prome lugar humildad mester bira su cuminda di tur dia, pasobra Dios ta halsa esun cu ta humilde, pero e orguyoso E ta mira di leu.
Murmuracion y kehamento tampoco no ta aceptable dilanti di Dios, pero oracion y gratitud ta bon bini tur momento.
Esun cu ta halsa su mes y kere cu e sa tur cos nunca lo yega na madures y crecemento spiritual, pasobra ningun hende na mundo sa tur cos.
Crecemento Spiritual y Madurez no ta cosnan cu ta sosode riba un dia, pasobra Dios ta entrega su sabiduria na esnan cu ta permanece den dje, y no na esnan pasahero, cu no ta kere, y cu ta busca fama pa nan mes, sin duna Gloria na Dios.
Hopi hende kier posicion, pero masha poco hende kier encargo, hopi hende kier ta lider, pero nan no kier obedece, nan kier manda riba otro hende y nan mes ta sinta wak ki ora e trabao ta bini cla, un lider semper ta pone man den e trabao, pasobra asina e ta encurasha su grupo pa traha, y esey ta un di e secretonan di madurez y liderazgo.
Nos Madurez y Crecemento Spiritual ta depende di e siguiente factornan.
Lubida Pasado; Laga e pasado bay, no keda mara na dje, pasobra e ta stroba bo di mira locual Dios tin pa bo y e portanan cu E ta bay habri pa bo. Y cada biaha cu e enemigo hanja un chens e ta lanta bo stress cu bo pasado.
Confesa nos picanan: Esun cu sconde su pica lo no prospera, esey ta nifica cu lo no tin crecemento.
1 Juan 1:9 ta bisa : Si nos confesa nos picanan E ta fiel y husto pa pordona nos , nos picanan y limpia nos di tur inhusticia.
Siña haci Oracion.
Juan 15:7 ta bisa: Si boso keda den Mi y Mi palabranan keda den boso, pidi tur loke boso kier,y esaki lo wordo hci pa boso. Laga nos tira un bista riba e condicion cu Hesus ta pone pa nos, E ta bisa si boso keda den Mi , si bo kier algo di Hesus bo mester keda den Hesus, esey ta nifica keda obediente na e palabra di Dios. Y asina ey e palabra lo cumpli den nos bida. Dios su palabra mester biba den nos curason .( Juan 16:23+24),
Siña Kere den Señor.
Tin hopi hende tin e fe di apostel Thomas , cu nan mester mira pa nan kere. (Juan 20:25) pero nos mester tin e Fe di Abraham.( Romanonan 4:18+19).
Siña Pordona.
Marco 11:24: Pesey Mi ta bisa boso ki ora cu boso ta para haci oracion, pordona si boso tin algo contra algun hende, pa boso Tata cu ta den cielo tambe pordona boso, boso transgrecionnan.(Mateo 6:14+15).
Siña Duna.
Lucas 6 :38 ta bisa: Duna y lo wordo duna na boso, un midi bon yena, bon primi, bon sacudi,cu ta basha over,nan lo drama den boso scochi. Pasobra cu mesun midi cu boso midi cune, lo wordo midi bek pa boso.
Siña Testifica Dios su palabra: Ma boso lo ricibi poder ora Spirito Santo bini riba boso,y boso lo ta mi testigonan na Jerusalem, y na henter Judea, y Samaria y te na e parti mas aleha na mundo.
No Compromete cu maldad, ma para firme riba e principionan di Dios.
