GLORIA NA DIOS, Awor cu nos tur ta na altura kico a sosode y kico ta spera nos, nos por bisa manera Esteban a bisa den Echonan di Apostel Capitulo 7 vers 59 “ Señor no tuma e pica aki di nan na cuenta.Pasobra modernisacion a pone hende lubida Dios, y e palabra ta bisa cu mi pueblo ta perece pa falta di conocimento ( Oseas 4 vers 5) pero tambe e ta meciona kico lo pasa ora bo rechasa conocimiento, y tambe kico lo pasa ora bo lubida e ley di bo Dios.
Pero pa awor nos ta bay pone tur locual a pasa un banda y nos ta bay sigi traha riba e Famia, pasobra Dios ta un Dios di famia, y como mayor ta abo ta dicidi kico bo ta permiti den bo cas, sea bo ta modernisa perde bo paz, of bo tin temor di Dios , cu ta trece sabiduria y Felicidad.
Laga huzgamento pa Dios, pasobra Señor Hesus a bisa den su palabra den Mateo capitulo 13 vers 30 : Laga tur dos crece hunto te na cosecha: Y na tempo di cosecha lo mi bise e cosechadonan: Recohe e yerba shimaron prome y mara nan na boshi pa kima nan, ma recohe trigo warda den mi mangasina.
Pero tambe Señor Hesus ta duna un splicacion hopi cla den (Mateo Capitulo 13 vers 36 te cu 43) kico ta shimaron y kico ta ta trigo, pesey e mes ta bisa , laga e yerba shimaron y tur esnan cu ta Piedra di trompeka y esnan cu ta haci inikidat y Señor Hesus lo mes deal cu nan .
Tambe tin den beibel henter un buki di Revelacion/ Apocalipsis pa tur hende ta na altura kico lo pasa cu esnan cu desobedece Dios su palabra y nan no arepenti, kico ta spera nan.
Como mayor nos kier bisabo , pa bo prepara bo cas, yena bo hogar cu oracion, cuida bo yiunan manera un galiña ta cuida su puito, pasobra nos no ta bibando den e mehor tempo nos ta biba den tempo trabahoso, wak rond di nos kico ta socode tur dia, cosnan malo, abuso di mucha en general ta aumentando, no ta importa ken a hacie , abuso ta keda abuso,y ta pesey como mayor bo tin di vigila.
Beibel mes ta splica nos pa nos ta alerta, pasobra e diabel a bini pa horta , mata y destrui, pesey nos ta zona e alarma pa abo como mayor cuida bo cas y no permiti pa e enemigo drenta, cu adulterio y violencia domestico.
Oracion ta e base di tur cos , e ta nos comunicacion cu Dios, nos mester haci oracion, un cas sin oracion ta un cas bashi, un bida sin oracion ta un bida bashi, un Famia sin oracion ta un famia sin direccion, asina serio oracion ta pa nos bida.
Hopi biaha ora bo ta bay haci oracion bo ta sinti soño, lanta ariba bay laba bo cara of bebe awa frui of coffie cayente, pero no keda sin haci oracion, mas oracion bo deposita den e banco na cielo, mas forsa bo tin pa resisti e enemigo aki na tera.
Si no tabata asina Señor Hesus lo no tabatin tanto contacto cu su Tata den Cielo pa medio di oracion, y nota bon cada biaha cu Señor Hesus bay den oracion, mas forsa e tin pa cana riba laman, y mas poder e tin pa calma biento, y mas poder e tin pa reprende satanas.
Pesey nos ta bisa abo como mayor cu bo por ta schaars na placa den bo saco, pero no laga oracion ta schaars den bo bida, pasobra awendia tur cos ta placa, pero den momentonan dificil, placa no por reemplasa Dios.
Concentra riba bo Famia, wak bon con abo y bo famia por sirbi Dios mihor, bisa manera Josue ami y mi cas ta sirbi Señor. Ohala tur mayor por a bisa asina cu un curazon sincero, sabiendo cu Dios ta nos refugio y Fortaleza.
Un yamada ta bay na e Pueblo di Aruba completo y tur caminda cu e mensahe aki por yega , pa laga nos busca HESUS CRISTO di henter nos curazon pasobra den dje so tin salbacion.
