Pastor Marcel Balootje: Confia den senjor bo Dios, y no biba di locual hende ta opina

Ora Dios bendiciona bo cu un bon plan, of un bon idea pa bo crecemento, spiritual, social, y wak bon cu ken bo ta comparti , locual bo a ricibi, pidi confirmacion di Dios, y haci locual Señor a bisa bo pa haci y lo bo tin exito.

For di fundacion di mundo envidia tabata presente, pasobra e tata di envidia cual ta e diabel, ta purba pa bruha tur cos , pero esnan cu ta confia den Dios, lo cumpli cu e proposito cu Dios a duna nan.

Envidia ta presente den tur area di nos bida, y pa vence esey bo mester pone tur bo plannan den man di Dios y confia Dios, pasobra eyden envidia no tin alcance, definitivamente e no por drenta.

Confia den Señor cu henter bo curason, y no depende riba bo mes comprondemento. Den tur bo camindanan reconoc’E y E lo dirigi bo caminda.( Proverbiona 3:5-6).

En bes di bisa y gaba cu mi tin Fe den mi mes, cual ta algo cu no ta para scirbi ningun caminda den e palabra di Dios, nos tin cu duna gloria na Dios, pasobra Dios ta e motor di nos bida, Dios ta esun cu ta duna bida, na prome lugar y sin Dios nos no por logra nada.

Esun cu ta confia den su mes curason ta un bobo,ma esun cu ta cana cu sabiduria lo wordo libra (Proverbionan 28:26).

Y esnan cu conoce Bo nomber lo pone nan confiansa den Bo,pasobra Abo, Oh Señor , no a bandona esun cu a busca bo.( Salmo 9:10).

No confia den prinsnan den yiu di hende, den kende no tin salbacion.( Salmo 146:3).

Semper mantene Dios na prome lugar y no haci ningun hende bo idolo, pasobra ora hende ta adora hende, sin nota nan ta haci bofon di Dios, tur hende su bida ta temporal , riba e mundo aki, y ningun hende no ta mas poderoso cu Dios, no laga placa y poder di hende susha bo cabes, pero mantene bo bista firme riba Dios. Y Dios nunca lo laga bo cara na berguensa.

No bende bo mes pa motibo di bo necesidad, no laga hende manipula bo pa motibo di placa, no laga ningun hende trapa riba bo derechi, pasobra bo no tin, pero pone bo confiansa den Dios, y spera riba Dios, pasobra solamente Dios por cambia bo lamento den baile.

E ta duna forsa na esun cu ta cansa, y E ta aumenta poder pa esun cu falta poder.( Isaias 40:29).

Esnan cu ta spera den Señor lo haña forsa renoba, nan lo bula bay ariba manera aguila, nan lo corre sin bira fatiga, nan lo cana sin cansa.( Isaias 40:31).

Den tur situacion di nos bida nos mester corda riba e promesa unico aki di Dios:

*** No tene miedo pasobra Mi ta cu bo, no desmaya, pasobra Mi ta bo Dios,Lo Mi fortalese bo, si Mi lo yuda bo,si lo Mi sostenebo cu Mi man drechi di husticia.(Isaias 41:10).

Esey ta un promesa cu ta solamente Dios por ofrece na hende, y ta solamente Dios por cumpli cune.

Pasobra Ami ta Señor bo Dios, kende ta sostene bo man drechi, Kende ta bisabo: No tene miedo lo Mi yuda bo ( Isaias 41:13).

Promesanan di Dios ta weso di lomba pa nos, promesanan di Dios lo tey pa semper, y Dios semper lo cumpli cu su promesa, pasobra ta para scirbi: Cielo y tera lo pasa , ma Mi palabranan lo no pasa.( Lucas 21:33).