Pastor Marcel Balootje: Con lo para cu esnan cu no ta kere, y ta rechasa cristo hesus?.

Ora mal tempo ta na caminda, tur instancia, y media ta contribui na comunidad, avisando cu tin un peliger na caminda y cu hende mester prepara.

Mas cu 2000 aña pasa Dios a stima mundo asina tanto cu E a manda su Yui unigenito, pa ken cu kere den dj’E no bay perdi ma tin bida eterna.

Hopi a kere ,pero tambe hopi a rechasa, y hopi awendia no ta sinti e necesidad pa kere, y hopi a aparta for di e caminda.

Y hasta tin ta kere cu nan por biba manera nan kier den tur sorto di bagamunderia y idolatria, pensando cu toch Dios ta contento cu nan .

Mas leu ainda tin ta biba na banda di e caminda di Dios, y nan ta pretende cu nan ta riba e caminda, pasobra nan kier come for di e mesa di diabel y e mesa di Dios.

Pero Dios den su inmenso amor a manda advertencia serio pa tur esnan cu ta duda, cu ta tarda pa entrega nan bida,of cu no kier entrega nan bida, y ta destina nan mes pa perdicion.

Di berdad, Mi ta bisa boso, e generacion aki lo no pasa, prome cu tur cos lo tuma lugar. Cielo y tera lo pasa, ma Mi palabranan lo no pasa.

Tene cuidao, pa boso curason no ta carga pa causa di paranda,y buracheria y e preocupacion nan di bida, y e dia ey no bini diripiente riba boso manera un trampa.

Pasobra e lo bini riba tur esnan cu ta biba riba superficie di henter mundo.Ma sea alerta tur ora bay, haciendo oracion pa boso por tin forsa pa scapa di tur e cosnan aki cu ta bay tuma lugar y pa para dilanti di e Yiu di Hende.( Lucas 21:34-36).   

Den e buki di Revelacion 21:8 e bijbel ta splica claramente ta ken ta esnan cu ta bay perdi, pero e sistema di e mundo awendia kier tapa solo cu un dede y ta purba tur momento pa sconde e berdad y hasta rechasa e berdad mescos cu e colebra a haci cu Eva den paraiso.( Genesis 3:4).

E mundo aki no kier pa bo bisa un persona e berdad den su cara, pasobra nan ta considera esey como husgamento, pa nan sigi biba den pica, y asina rechasa Dios. 

** Awor aki tin cierto parti pais cu no kier pa haci oracion cu un persona pa libre for di gara di satanas, pero esaki ta locual cu Cristo a comanda nos ( Marco 16:17).

Esun cu vence lo hereda e cosnan aki, y Ami lo ta su Dios, y e lo ta Mi yiu:

***Ma e cobardenan ( Esnan cu no kier para contra e sistema di mundo, pero cu ta acepta y apoya cosnan cu ta contra Palabra y boluntad di Dios pa beneficio personal),

*** E incredulonan (Esnan cu a tende pero a rechasa e palabra di Dios y no ta kere den su unico Yiu),

*** Y e abominabelnan ( Esnan cu awendia ta haci tur cos pa mundo acepta nan, cu kier cambia ley di Dios, y pone esun di nan preferencia). 

***Y e matadonan y e fornicadornan, y e hacidornan di bruha, y e adoradornan di Dios falso y tur gañado, nan parti lo ta den e lago cu ta kima cu candela y zwavel,cual ta e di dos morto.( Revelacion 21:8 y su splicacion).

E dia y e ora di e binida di nos Señor Hesus Cristo ningun hende no sa, pero nos mester ta prepara.