Tin hopi stress y depresion scondi, den e temporada di carnaval, bao di e capa di jump up,hopi alcohol y droga y fiestamento casi henter siman.
E diabel ta un gran mentiroso, cual ta hinca hende den un scuridad temporal, cohe dominio riba nan, y nan ta pensa cu e temporada aki lo no pasa, pero e mes ta para cla ta warda ora e fiesta caba pa e bin ataca cu tur su forsa.
Pesey e palabra di Dios ta bisa tur hende den Mateo 11:28, Bin serca mi tur cu ta cansa y carga y lo mi duna boso sosiego.No warda Carnaval caba pa bo busca Dios, pasobra e ladron a bini pa solamente horta, mata y destrui. ( Juan 10:10).
Ta hopi cos ta bay sali na cla despues di carnaval, y hende mester ta prepara fuertemente den Cristo pa resisiti tur locual cu e enemigo a planea contra nan of contra tur locual nan mes a habri porta pa e enemigo drenta, haci y deshaci.
Humiya boso mes anto bao di e man poderoso di Dios, pa e por halsa boso na e tempo apropia, tirando boso preocupacion riba dj’E , pasobra E ta percura pa boso. ( 1 Pedro 5:6-7).
Pasobra nos mes tambe un tempo, tabata ignorante,desobedecido, gañado, esclavisa na varios pasion y placer , bibando den malicia y envidia ,odioso y odiando otro. Ma ora cu e cariño di Dios nos Salbador,y su gran amor pa humanidad a aparece. E a salba nos no a base di obranan, cu nos a haci den husticia, ma segun Su miserocordia, pa medio di laba mento di regeneracion y renobacion pa medio di Spirito Santo. Kende E a basha ricamente riba nos pa medio di Hesus Cristo nos Salbador.( Tito 3-3-6).
Arepenti anto y comberti pa boso picanan wordo kita, pa temponan di refrescamento por bini for di e presencia di Señor.( Hechonan 3:19).
Serca hopi hende stress y depresion ta cosnan cu a pasa den nan bida cu nan no kier laga bay, of no kier pordona, y ta pesey e enemigo ta keda usa mes un cosnan pa pone nan trompica, y cansa nan mente , pa nan no por reacciona y sirbi Dios.
Den un palabra bisa e enemigo sa cu e lus di Dios ta riba bo, pero e kier haci tur manera pa bo lus no bria y bo wowo habri y asina bo por reprende den nomber di Cristo Hesus.
Ora hende ta bao di influencia di fiesta, alcohol of droga, tur dolor ta bay, pero asina ora e dianan di fiesta pasa ,e dolor y preocupacion ta bini bek , pero nos tin di corda cu ta para scirbi: No preocupa pa nada, ma den tur cos,pa medio di oracion, y suplica cu gradicimento, laga boso oracionan ta conoci dilanti di Dios. Y e pas di Dios cu ta surpasa tur comprendemento, lo warda boso curason y boso mente den Cristo Hesus.
Hopi hende no ta kere, pero desobedencia na Dios, ta pone nos curason na peliger, e enemigo ta e gran mentiroso, cu ta pone hende kere cu nan por biba manera nan kier, sin ningun temor di Dios, conociendo Dios y toch sigi peca boluntariamente. ( Hebreonan 10:26).
Ta tempo pa nos ta serio cu Dios, y no participa den obranan infructifero di scuridad, no uni den yugo desigual, pasobra e tempel di Dios no tin combenio cu idolo. No lubida cu nos ta e tempel di Dios y e Spirito di Dios ta biba den nos.
