Pastor Marcel Balootje: Chansamento cu pica por ta desastroso

Hopi hende no ta compronde of no kier compronde cu e diabel a bini pa horta mata y destrui.

Bo ta mira hende grandi ta comporta nan mes manera mucha chiki, rechasando locual ta berdad, y garando na mentira.

Como creyente nos tur tin lucha contra e reino di scuridad y di berdad nos lucha no ta contra carni y sanger, y nos armanan cu nos ta bataya cune no ta carnal ma poderoso den Dios pa basha fortinan abao.( 2 Corintionan 10:3).

Nos bida di oracion ta pa haci nos menos vulnerabel na e atakenan di e enemigo, pesey laga bo bida di oracion ta uno firme y fuerte, pa asina bo por rechasa tur flecha sendi di e enemigo.

Diabel ta mas sabi cu hende, esey tur hende mester sa, y e ta pone su trampa pa tur hende, no ta importa con sabi bo ta. Ta solamente e presencia di Dios den bo bida por scapa bo, ta pesey Dios a presenta na nos tur sin exepcion, of mihor bisa na mundo completo (Juan 3:16-18).

Tur hende cu confesa cu nan boca y kere den Cristo Hesus ( Juan 1:12+13 y Romanonan 10:9-10) ta  bira yiu di Dios, y ta ricibi bida eterna, ma esnan cu rechasa y chercha lo sufri e consecuencia. Cual ta para scirbi den Juan 3:36,

Hopi no kier scucha y kere e Berdad , pero e ta para scirbi ( Mateo 13:24-30) y cu pronto nos lo reconose ken ta esnan cu ta biba cu Fe y confiansa den Dios, y esnan cu ta biba pa nan mes, den nan inmoralidad, capricho y falta di pordon.Pesey e evangelio mester wordo predica.

Dios no por revela su proposito na un persona cu ta nenga di arepenti y confesa su pica ( Hechonan 2:38).

Si un hende no reconoce y arepenti y aparta for di pica su bida lo no cambia.

Maldad a aumenta asina tanto cu ta imposibel biba sin Cristo Hesus den nos bida.

Nos ta bibando den e tempo manera Genesis 6 :5 caminda tur intencion y pensamento di hende su curason ta basa riba maldad so.

Pesey mes den Mateo 28:19 Hesus ta bisa, bin serca mi tur cu ta cansa y carga y lo mi duna boso sosiego. Pero hopi ta esnan cu ta hunga wise y ta kere cu nan mes por resolve nan asunto, y ta sigi 

den nan bagamunderia, rechasando asina e bondad y cariño di Dios pa salbacion.

Den Salmo 91 ta para scirbi: 

Esun cu ta biba bao di e proteccion di e Altisimo, lo permanece den e sombra di e Todopoderoso.

Pa nos permanece den e sombra di e Todopoderoso, nos mester tin Cristo Hesus na prome lugar den nos bida, e no ta asunto di pone Bijbel habri riba mesa den sala, mientras cu bo tin curason dobbel ( Santiago 1: 5-8).

Dios ta lus y den dj’E no tin nada, nada di scuridad, scuridad ta purba di drenta tur caminda y si nos bay purba haci wega cune e ta ciega nos bista.( Huesnan 16:4-21).

Chansamento cu pica tin hopi famia kibra, y hopi mucha den problema, cu tristesa y dolor pasobra nan mayornan a bay chansa cu inmoralidad ,y e resultado a bira divorcio.No lubida cu e ladron a bini pa horta , mata y destrui.( Juan 10:10).

Un clamor mester wordo lanta na Dios, pa Dios tene misericordia y yuda sera tur scheur den muraya di famia. Especialmente caminda mayornan no tin comunicacion cu otro y yuinan ta pa nan cuenta.