Ta conoci pa nos tur , mescos cu hende ta perservera pa haci bon, di otro banda tin hende ta persisiti pa haci malo.
Mescos cu hende ta haci tur nan posibel pa construi, tin hende di otro banda, cu sa bon, bon cu ta malo nan ta haci, ta sigi cu nan plan destructivo.
Mantene un capricho ta mescos cu purba wanta biento di bo man, pasobra bo sa cu bo man ta bashi, pero toch bo ta kere cu bo tin algo, pero tur hende sa cu bo no tin nada.
Capricho ta algo temporal, cu ta parce bunita, pero na final ta dolor y decepcion ta bini hunto cune.
Dios den su palabra ta spierta tur hende di capricho y duresa di curason bisando: Ma pa motibo di bo capricho y bo curason cu no kier arepenti, bo ta montona furia pa bo mes den e dia di furia y revelacion di e huicio husto di Dios. Kende lo paga cada ken segun nan obranan.( Romanonan 12:5)
Nos tur mester arepenti di nos picanan, pidi Dios pordon, kere den Cristo Hesus pa nos ta salba, y biba un bida den boluntad di Dios.
Pasobra salbacion ta personal pa un y tur, y Hesus tey tur momento pa nos tur , pasobra Hesus mes a bisa y ta para scirbi den Mateo 11:28 : Bin serca mi tur cu ta cansa y carga y lo mi duna boso sosiego.
Aki nos ta compronde cu tin cosnan den nos bida, cu ta solamente cu nos yegada serca Hesus, nan por wordo kita pa semper, nan por wordo derota pa medio di e presencia di Cristo Hesus den nos bida, pasobra ni maske cuanto nos bira rond y tarda, haci manera nos mes por yuda nos mes, nada lo no cambia.
Hopi biaha hende ta purba reemplasa e bashi di Dios den nan bida afiliando nan mes den cierto gruponan,caminda nan por vocifera nan pensamiento contra Dios y contra su palabra, y net eynan nan ta demostra e falta di presencia di Cristo den nan bida.
Hesus a bisa esun cu no ta cu Mi, ta contra Mi y esun cu ta contra mi ta plama.
Nos tur sa cu esun cu reconoce Cristo aki na tera, lo wordo reconoci pa Su tata cu ta den cielo.
No ta existi shortcut pa yega serca Dios, ta un caminda tin pa rico y pober, sabi y menos sabi, grandi y chiki. gordo y flaco, homber y muher, tur mester yega na Cristo Hesus pa nan por hereda e reino di Dios.
Ora nos curason ta duro y nos no kier pordona, nos no kier tende, nos ta pretende di ta sabi y di sa tur cos, pero nos no kier acepta Palabra di Dios den nos bida, cual ta trece felicidad den nos bida, di berdad, berdad, nos ta montona furia di Dios pa nos mes.
Dios tin pasenshi y no kier pa ningun hende bay perdi, pero pa tur hende por bin na arepentimento.
Nos tin cu comprende cu cada dia nobo, ta un dia mas serca e binida di nos Señor Cristo Hesus, y mas nos por persisti den e mundo di scuridad nos chens di keda atras ta hopi grandi.
Tur locual hende sembra nan lo cosecha. ( Galationan 6:7).
Laga awe ta e dia pa bandona tur capricho y duresa di curason, un dia pa arepenti.
Si nos confesa nos picanan, Dios ta fiel y husto pa pordona nos , nos picanan, y pa limpia nos di tur inhustia ( 1 Juan 1:9).
