Den e boluntad di Dios tur nos soñonan por wordo realisa, pasobra e palabra di Dios ta bisa den Juan 15:4: Keda den Mi, y Ami den boso.Mescos cu e rama no por carga fruta di su mes , si e no keda den e mata di wijndruif, asina boso tampoco si boso no keda den mi.
Nos mester ta fuerte den Señor den e forsa di Su poder, pa asina nos por resisti e adversario den tur forma, y logra nos meta semper y cuando nos ta den boluntad di Dios.
Ora nos ta den e boluntad di Dios nos tin bida eterna.( Juan 3:16)
Ora nos ta den e boluntad di Dios nos tin sabiduria divino. ( Colosensenan 1:9-11).
Nos tin aceso na e promesanan di Dios .( 2 Corintionan 1: 20-22).
Nos por scucha e bos di Dios.( Juan 14:17).
Nos tin un bida ordena ( Proverbionan 20:24).
Cada dia nos ta mira cu hende kier cumpli cu boluntad di hende, of cu nan mes boluntad segun nan agenda, segun ta cumbini nan , y ta purba di tur manera pa laga orguyo y arogancia domina, y no sigi e palabra di Dios.
Pero nos tin cu recorda cu tur esnan cu ta for di e boluntad di Dios, no por drenta e reino di Dios, awor manera e palabra di Dios ta bisa: Y pakico boso ta yama mi Señor, Señor y no ta haci locual Mi ta bisa? ( Lucas 7: 46).
Pakico un hende ta saca rijbewijs si e no ta sigi ley di trafico.
Pakico un hende ta traha yiu si e no kier cumpli como tata.
Pakico un hende ta tuma un posicion y e no ta eherce e labor.
Un bida den seriedad cu Dios ta hopi importante, Dios su boluntad ta riba tur cos.
Y nos no tin mester di ningun hende bisa nos, pasobra e manera cu nos bida ta bay, ta demostra cu nos ta den boluntad di Dios.
No biba malo y despues bisa cu hende ta huzga of hende ta discrimina bo, pero bo ta cosechando di locual bo mes a sembra, pasobra ningun hende no por haci bofon di Dios.
Asina un hende pone boluntad berdadero di Dios un banda, y cuminsa biba den inmoralidad y bagamunderia, y mantene pensamento cu ta contra e palabra di Dios, nan mes ta cay den nan mes rechaso, pasobra e Spirito di Dios ta aparta for di nan bida, pasobra nan no ta den e boluntad di Dios, y ta pesey nan ta sinti nan mes rechasa.
Ta pesey ta masha peligroso habri boca grandi contra Dios y Su Palabra y asina falta respet na e autoridad Divino, demostra cu palabra y actuacion un posicion di rebeldia contra Dios, pasobra ora Dios su furia lanta ningun hende no por wante. ( Romanonan 2:5).
Peligroso ta ora nos bandona e caminda di berdad y cuminsa biba den fabula, den mentira, den scuridad satanico y kere cu nos ta sabi, y hasta purba influencia otronan cu nos bobedad.
Hesus a bisa den Mateo 12:30: Esun cu no ta cu Mi, ta contra Mi, y esun cu no ta recohe huntu cu Mi ta plama. Ta dificil biba un bida contra Dios, contra e Creador di tur cos, y nos tur sa cu te awe ningun persona cu a purba esey no a logra nada.
No laga ningun hende gaña boso , tin cosnan cu ta parce bunita, pero nan final ta tristesa, Galationan 5:19-21 ta duna un bon splicacion di esey.
