E presencia di Dios no por wordo separa for di e poder di Dios, den tur locual cu nos ta haci nos mester di e presencia y e poder di Dios como nos guia.
Ora hende ta planea cosnan y bo ta mira tempo ta pasa y nada no ta wordo logra, bo ta sa inmediatamente cu nan kier haci tur cos lagando Dios afo.
Asina nos ta den e boluntad di Dios ,Su presencia y Su poder ta compaña nos ,y tur miedo lo aleha, pasobra nos Fe ,ta firme den esun cu tin tur poder pa yuda nos.
Tin hende cu tin miedo di menciona e nomber di Hesus, nan ta inventa tur tipo di nomber , pero nan tin miedo di bisa Cristo Hesus ta Rey di Reynan Señor di Señornan.
Ta Dios a traha universo, y cu pa e nomber di Hesus tur rudia mester dobla, di esnan di esnan cu ta den cielo, riba tera y bao di tera y cu tur lenga mester confesa cu Hesus Cristo ta Señor pa gloria di Dios Tata.( Filipensenan 2:10).
Placa no ta tur cos, Dios tabata tey prome cu placa y placa no por reemplasa Dios, aunke cuanto placa nos tin, nos mester di sabiduria di Dios, pa nos por alcansa nos meta.
Den Exodus 33:15 Moises a bisa Señor: Si bo presencia no ta bay cu nos, no hiba nos for di aki nan. Esey ta nifica cu e presencia di Dios ta bini na prome lugar.
E presencia di Dios tey hunto cu nos ora nos ta biba pa Dios, haci oracion y canta alabansa.
Den un bida di inmoralidad, violencia, orguyo, rabia y odio e presencia di Dios no tey.
Den Proverbionan 6:16 : Ta para scirbi e seis cosnan cu Dios ta odia y aun e di siete cu ta un abominacion pe, y den eseynan lo tin ausencia di e presencia di Dios.
Den Galationan 5:19 -21 ta splica di e obranan di carni y ta para scirbi ; Mescos cu mi a spierta boso di antemano, mescos cu mi a spierta boso caba di antemano, cu esnan cu ta practica sorto di cosnan asina lo no hereda e reino di Dios. Pasobra Dios kier demostra cu caminda tin pica su presencia no tey.
Den 1 Corintionan 6:9 Dios su palabra ta bisa: Of boso no sa cu e inhustonan lo no hereda reino di Dios, y ey nan e palabra di Dios ta bolbe siña cu Su presencia no ta caminda hende ta practica maldad.
Awendia hende ta prefera amistad cu mundo caminda e presencia di Dios no ta, cu biba den comunion cu Dios.
Hopi ta haci curason duro y bira enemigo di Dios, enbes di sera amistad y intimidad cu Dios.
A yega e momento pa hende realisa den ki tempo nos ta biba, pasobra e tempo ta trabahoso, pero tambe e palabra ta siña nos pa tuma e armadura completo di Dios y para firme . ( Efesionan 6:13-17).
Romanonan 12:2 ta bisa nos pa no sea conforme e mundo aki, ma sea transforma pa medio di renobamento di boso mente, pa boso por comprende kico ta e bon,y agradabel y perfecto boluntad di Dios.
Pasobra tur locual ta bondad ta bini di ariba, y ta bini for di Dios.
Hende ta busca problema cu Dios, rechasando e presencia di Dios, y anhelando scuridad di mundo.
No laga malo vence bo, ma mas bien vence malo cu bon.( Romanonan 12:21).
Awor ta e momento pa busca e presencia y poder di Dios.