Laga nos tur cu ta papia di Señor, biba drechi den Señor.
Rey David a bisa su yiu Salomon lo siguiente: Pa loke ta abo mi yiu Salomon, conoce e Dios di bo tata, y sirbie cu henter bo curason, y cu un alma boluntario, pasobra Señor ta scrudiña tur curason, y ta comprende tur intencion di pensamento. Si bo busk’E , E lo laga bo hañ’E , ma si bo bandon’E . E lo rechasa bo pa semper. ( 1 Cronicanan 28:9)
Pa siglo y siglo nos Dios a keda mesun Dios ,nada no a cambia, tur cos a keda mesun cos, esun cu hala serca Dios lo ricibi bida eterno den cielo , esun cu aparta for di Dios lo ricibi morto eterno den fierno.
Den Juan capitulo 15 Hesus a bisa: Ami ta e berdadero mata di wijndruif y mi Tata ta e cunukero.
Mescos cu e rama no por carga fruta di su mes, si e no keda den e mata di wijndruif, asina boso tampoco si boso no keda den Mi.
Un mayor nunca por conseha su yiu pa bay contra e palabra di Dios, semper e mayor mester ta cla pa coregi cu e berdad, y pasa locual pasa e mester permanece den e berdad, pa asina Dios por wordo glorifica den e famia.( Santiago 5:16-17).
Locual David tabata kier pa Salomon compronde cu e Dios cual e ta sirbi cual ta e Dios di ehercitonan di Israel, e Dios di Abraham, Isaac y Jacob, ta e Dios Todopoderso, kende a traha cielo, tera y laman.
Y cu tur momento e por yama riba nomber di Dios, pasobra ora nos confesa nos pica Dios ta fiel y husto di pordona. Esey ta nos Dios .(1 Juan 1;9).
Ta deber di tur mayor di por presenta Dios na nan yuinan, pasobra pa falta di conocemento di Dios, hopi mucha ta cay den trampa di e enemigo. Awendia tin hopi consehero, cu ta trose e palabra di Dios.
Hopi kier mantene amistad, haci hende contento, pone hende sinti nan mes comodo den inmoralidad, sin recorda hende riba arepentimento, pasobra tur hende mester duna cuenta na Dios.
Si abo como mayor conoce Dios, awel bo deber ta pa guia bo yiu den caminda di Dios, y no laga diabel sigi mansa bo yiu, pasobra asina e muchanan ta cay den problema, pasobra no tin hende pa bisa NO, of no tin hende pa bisa TA BASTA.
Pero si abo mes como mayor no conoce Dios, a yega tempo pa buske di henter bo curason pa asina abo y henter bo hogar por sirbi Dios.
Awor mas cu nunca nos mester tene esaki bon na cuenta, pasobra hopi di nos como mayor ta preocupa cuanto cen nos tin na banco y si nos por cambia auto cada 2 anja, mientras cu e nivel spiritual den cas ta hopi abao, y infiltracion di maldad y inmoralidad ta creciendo tur dia rond di nos.
Un di prome mandatonan cu Hesus a duna su disipelnan ta pa bay y predica e evangelio na tur criatura, esey ta nifica ken cu nan ta, nan mester ricibi e palabra di Dios.( Marco 16:15-20).
Y e di dos mandato ta : Pa den nomber di Cristo Hesus nan lo saca demoño, y esey nos ta mira awor cuanto movecion satanico tin diariamente, pasobra cada falta di respet pa Dios su palabra ta un movecion di e mundo di scuridad. Tin hopi hende cu no sa cu enemigo tin nan bida controla.
Laga nos halsa oracion na Dios pa tur famia.( Santiago 5:19-20).
