Ta hopi remarcabel con a bira cu hende ta broma ora nan rabia, con nan a dal hende , con nan a kibra cos den cas, con nan fuse a bula, con duro nan corre auro riba caya door di rabia, con nan a insulta polis door di rabia y bringa cu polis y keda detene, con nan a maltrata nan esposa y yiunan door di rabia, cuanto cerbes y whisky nan a bebe door di ta rabia, con nan a bay for di cas door cu nan ta rabia etc, y un multitud di pretencion mas sin busa drechi, cu Rabia no ta cos di haci wega cune.Rabia no ta solamente mental y fisico pero e ta wordo pusha door di diabel pa asina pone bo haci cosnan den obedencia na diabel.
BEIBEL ta msutra nos claramente den Exodus capitulo 32:19 y Numbernan 20 vers 7 te cu 13 con pa motibo di rabia Dios a corta Moises su ministerio. Y tanto Moises como Aaron no a drenta e tera priminti. Esey ta pone cu rabia por ponebo haci locual cu bo kier, pero no ta locual cu abo kier ta agrada Dios. No ta importa ken bo ta , pasobra di Dios ningun hende ta haci cherchi. Y den Numbernan Capitulo 20 vers 7-13 nos ta mira cu bo no por haci oracion na Dios, pidi Dios yudansa y caba bo tin carta scondi den bo manga di camisa, pa bo haci manera cu abo kier.
Hopi hende ta bolbe sconde tras di Covid, y falta di trabao, y escases financiero, pa manifesta rabia cu hopi tempo caba ta biba den nan, pero nos kier recordabo cu Covid ta pasa, pero bo chens di perde bo libertad, ta grandi, y hasta perde bo famia y tur cos.
COLOSENSENAN 3;8 TA BISA :Ma awor boso mester pone tur esaki un banda , Rabia, Furia, Malisia, Calumnia,y palabra sushi for di boso boca.
Palabra sushi a bira vocabulario pa hopi hende, cu ta kere cu esey ta soluciona problema, cu ta asina ta educa yiu, cu esey ta mihor forma pa comunica cu esposa/esposo.
Awel esey ta un engaño satanico, cual tin hopi hende domina, y cu mester busca yudansa di Dios urgente, pa asina bo por wordo libera di e mal spirito aki.
Hopi biaha bo ta haña sa cu un hende tin doble personalidad, door cu e tin mal rabia, y hasta bo ta tende mayor ta bisa cu for di chiki e yiu tin mal rabia, esey no ta algo di broma cune, esey ta un mal spirito cu mester di liberacion di dje, cual na prome lugar e persona mester entrega su rabia na Dios door di oracion, ta pesey Santiago 4;7 ta para scirbi cu somete bo mes na Dios resisti e diabel y e lo hui bay for di boso.
Santiago Capitulo 1 vers 19-20 ta splika nos cla : Comprende esaki mi rumannan stima: Tur hende mester ta lihe pa tende, no lihe pa papia, y no lihe pa rabia. Pasobra rabia di hende no ta produci husticia di Dios.
Rabia ta un sushedad cu kier domina bo bida , daña bo testimonio y caba cu bo integridad.
Nos mester Alerta e pueblo di e spirito di rabia, y palabra malo cu ta moviendo, cu ta destrui Famia, caba cu Amistad, debilita nos hubentud, hopi di e muchanan cu ta cana den geng ta domina pa un rabia den famia, den cual nan a mira violencia domestico tuma lugar, y esey a causa rabia y rebeldia.
Nos tin crisis social, pero rabia ta un di e cosnan cu mas ta pusha pa violencia domestico, y e no ta kita cu sali pafor di cas , hala un rosea grandi, of sali bay den auto, dal un buelta dal dos bitter , etc, etc.
Bo por wordo cura di bo rabia ora bo entrega bo mes na Dios, awe mes y pidie kita e rabia for di bo curazon, drenta den bo bida , y duna bo un curazon nobo, pidi Dios saca palabra sushi for di bo boca, y laga respet, moral, y bon manera brota for di bo curazon.
Solamente Dios por cura bo curazon di rabia, y locual Dios haci ta permanente , acudi awe mes serca Señor , bo cura ta gratis.
