Den un mundo yen di engaño y tracion, Dios keto bay ta habri porta pa su yuinan, pasobra Dios ta amoroso y misericordioso y su bondad ta dura pa semper.
Pero nos tin di tene cuenta cu mescos cu Dios ta habri porta pa nos , e diabel tambe ta habri porta di tentacion pa nos, pasobra mescos cu Dios ta interesa pa drecha cos pa nos, e diabel ta interesa pa daña cos pa nos.
Nos mester tene cuenta cu un porta cu Dios habri no ta contradeci su palabra, hopi biaha nos ta ripiti esaki pasobra tin hopi hende ta cay den trampa y nan ta puntra dicon, pasobra nan no ta lesa nan bijbel, no tampoco tin un bida di oracion.
Dios nunca ta kibra un bida di un hende, pa e forma un bida cu bo, Dios mes a bisa cu locual E uni no laga ningun hende separa, esey ta nifica cu Dios nunca lo kibra un matrimonio, pa asina haci otro hende feliz, no kere den e bagamunderia ey.
Si bo forma algo riba bo mes forsa, bao di engaño y traicion, pa asina stroba otro hende, di yega nan meta, esey ta sosode sin Dios, si bo ta gaña, pa obtene locual bo mester esey ta sosode sin Dios, pasobra Dios ta luz y den dj’E no tin nada, nada di scuridad.
Pesey semper ora un porta habri den bo bida wak bon si e ta cuadra cu e Palabra di Dios y si no ta asina, e ta un tentacion. Pasobra di mes lo bo sa si e ta un contesta di bo oracion,of ta trampa.
Ora Dios habri un porta den bo bida e ta conforme cu su palabra, pa bo sa cu ta Dios ta den e asunto, pasobra bendicion di Dios no ta añadi tristesa hunto cune.
Tur porta cu Dios habri pa nos ta pa nos bira mas dependiente di Dios, Dios nunca ta habri un porta cu ta aparta nos for di Dios, pesey hopi biaha nos tin di wak bon, pasobra e diabel ta cana manera leon cu ta gruña pa wak ken e por debora. Asina bo ta den algo cu ta kita bo tempo pa Dios, bo mester lanta for di soño.
Den Revelacion 3:8 ta para scirbi: Mi conoce bo obranan , mira mi a pone bo dilanti un porta habri, cu ningun hende no por sera, pasobra bo tin poco poder y a warda mi nomber.
Ora Dios ta habri un porta pa bo, e no ta wak color, ni cabey, ni famia, ni placa, ni si bo a caba universidad si of no, pasobra ningun di e cosnan ey no ta hala atencion di Dios.Ta bo fe y bo confiansa den Dios ta move tur cos ( 1 Cronicanan 4:9) (1 Corintionan 1:27-29).
Den Revelacion 3:20 ta para scirbi: Ata mi ta para na e porta y ta bati, si un hende tende mi bos y habri porta, lo Mi drenta serca dje, y lo cena cune y e cumi. Ta un gran bendicion ora nos habri nos bida pa Cristo Hesus, y nos permiti E drenta , pa asina nos siña arepenti y pordona.
Ora porta wordo habri den nos bida, nos tin di wak e amor pa placa no bira mas grandi cu e amor pa Cristo.(Lucas 12:15).
Ora porta habri nos mester tene bon cuenta cu nos lenga y kico nos ta papia ( Proverbionan 21;23).
Ora porta habri pa nos nos tin cu cuida otro ( Filpensenan 2:3-4).
Ora porta habri pa nos nos mester tene cuenta cu amistadnan nobo (1 Corintionan 15;33).(Proverbionan 13:20).
Y mas cu tur cos nos mester tene cuenta cu e binida di nos Señor ( Mateo 24:42).