Pastor Marcel Balootje: Bo curazon ta altar di oracion dilanti di Dios

Crea den mi un curason limpi, O Dios, y renoba un spirito recto den mi.No tirami for di Bo presencia, y no kita bo Spirito Santo for di mi. Dunami atrobe e goso di Bo salbacion. Y sostenemi cu un spirito boluntario.( Salmo 51:10-11-12). 

Tur caminda cu nos bay, nos curason ta bay cu nos, Dios no ta wak cara di hende, ma Dios ta wak curason, y mas bien Dios conoce cada intento di nos pensamento, y Dios ta lesa curason di hende, loke dokternan no por mira, Dios si ta mire, no tin existi machine cu por lesa curason di hende, pero e Spirito di Dios ta revela tur locual cu tin riba hende su curason.

Pesey como hende, y especialmente ora bo ta un mayor, mihor bisa un homber para como cabes di cas den presencia di Dios, bo curason mester ta limpi y conecta cu Dios, pasobra abo ta e base di tur movecion spiritual den bo cas.

Un homber cu un curason limpi dilanti di Dios, ta gosa di un vision inmenso den presensia di Dios con pa dirigi su hogar.( Genesis 13;8),

Pero asina e homber su curason, kita for di Dios, y bay tras di cosnan di mundo, e hogar ta tambalia.( Genesis 13:12-13).

Loke ta sali for di hende, esey ta loke ta contamina hende, Pasobra for di paden, for di curason di hende, ta sali mal pensamento,fornicacion, ladronisia,matamento, adulterio. Hechonan di cudishi y maldad, tambe engaño, sensualidad, envidia,calumnia,orguyo,y bobedad.Tur e maldadnan aki ta sali for di paden y ta contamina hende.( Marco 7:21).

Warda bo curason riba tur cos, pasobra e ta e fuente di bida.( Proverbionan 4:23).

Nos ta bibando den un tempo caminda coreccion no ta wordo acepta, disiplina no ta conta, y mas cu tur cos temor di Dios ta bayendo for di bida di hende.

Tin un palabra na moda cu ta bisa” Gosa Bida”, pero e palabra di Dios ta bisa lo sigiuente: Ay di esnan cu ta yama loke ta malo bon, y loke ta bon malo.

Loke ta scuridad lus y loke ta lus scuridad, scuridad,loke ta marga dushi, y loke ta dushi, marga.(Isaias 5;20)

Ora bo ta haci oracion, tene cuenta cu ta for di bo curason bo tin di papia cu Dios, pasobra ta for di bo curason Dios ta scucha, laga bo oracion ta profundo y cu confiansa, ta imposibel pa bo duda den locual bo mes ta pidi, sabi cu tipo di oracion asina no ta yega ningun caminda.

Ma abo ora bo ta haci oracion,bay den bo camber di mas paden,y ora bo a sera bo porta, haci oracion na bo Tata cu ta den scondi, y bo Tata cu ta mira den scondi, lo recompensa bo.(Mateo 6:6).

Mantene bo curason liber di orguyo, rabia, odio, amargura, pasobra tur e cosnan ey ta manca bo comunicacion cu Dios. Locual Dios ta desea semper bay den su presencia ta un curazon humilde, pasobra hende humilde na tur momento su curazon ta habri pa obedece Dios.

Ora nos ta haci oracion, laga nos papia e berdad cu Dios, laga nos confesion ta sali for di profundo di nos curason, pasobra si un hende no papia berdad cu Dios, ta cu ken lo e papia e berdad, pasobra Dios sa bon, bon ki ora un hende ta gaña y ki ora e ta papia berdad.

Bo curason ta bo altar dilanti Dios, mantene bo curason limpi y puro, no sera bo curason pa hende, pa asina nada no stroba bo oracion dilanti di Dios.