Ora nos ta kere den Dios , nos mester obedece Dios, sino ta tempo perdi.
Hopi ta para halsa bos y bisa cuanto nan ta stima Dios, cuanto fe nan tin, pero ora ta yega e momento di obedencia na Dios, tu cos ta cambia y multitud di excuus ta bini pa dilanti.
Nos bista mester ta centralisa riba Crsito Hesus e Salbador di nos alma y e Redentor di nos bida.
Nos mester kere y obedece pa nos oracion por tin exito.
Pesey ora nos ta haci oracion nos mester haci manera Señor a siña nos; Ma abo , ora bo ta haci oracion, bai den bo camber di mas paden, y ora bo a sera e porta, haci oracion na bo Tata cu ta den scondi, y bo Tata cu ta mira den scondi, lo recompensabo.( Mateo 6:6)
Pasobra ta masha hopi distraicion ta presenta ora hende mester haci oracion.
Un bon conseho pa un y tur ta cu ora bo ta bay haci oracion, paga bo telefon y lage pafo di camber, pa asina ningun mensahe of misscall por distrai bo for di bo tempo den presencia di Dios.
Ora nos ta obedece Dios, nos tin di haci exactamente manera Dios ta bisa, pasobra ora nos no ta obedece ta envano nos ta kere, pasobra den obedencia tin confiansa y ora Dios mira confiansa, di mes Dios ta sa cu tin fe, y asina nos ta yega na nos milager.
Abraham a obedece Dios y a bay bon, su obedencia a hacie tata di nacionnan..
Noe a obedece Dios y tur cos a bay bon, e a traha e Arca y asina e mes y su famia a wordo salba .
Isaac a obedece Dios y tur cos a bay bon, e a sembra cunuco den tempo di hamber y secura y a cosecha.
Hopi biaha nos no ricibi locual nos ta spera, pa motibo di desobedencia, nos ta papia algo cu nos boca pero nos actitud ta contradeci nos oracion.
Den Juan capitulo 4 e oficial di rey a pidi Hesus pa bay su cas cune pa cura su yiu pasobra e yiu ta muriendo: Hesus a contesta , bay numa bo yiu ta bibo. E homber a kere e palabra di Hesus a papia cune y e a bay.
Mientras cu e tabata na caminda ainda su esclabonan a bin contre y bise bo yiu ta bibo.
Laga nos concentra un momento riba e obedencia cu e homber ey tabatin den Hesus, pasobra e a sali bay busca Hesus personalmente y awor e ta bay cas cu e Palabra cu Hesus a bise.
Ora nos ta obediente na Dios su palabra ta haci milager den nos bida, portanan lo habri pa nos, enfermedad ta wordo sana, pasobra nos ta obediente.
E muher cu 12 aña cu problema di sanger a pensa y e tabata obediente, e a bisa , si mi mishi solamente cu e zom di su bisti lo mi ta sana, y su obedencia a hibe na su milager.
Bo obedencia ta bal mas cu bo placa, pasobra bo no por cumpra bo sanacion, pero si bo kere den Señor y ta obediente na Señor lo bo ricibi bo sanacion.
Haci manera bo ta obedece, tambe ta falta di obedencia, obedencia ta parti di bida di esnan cu ta stima Dios , esnan cu berdaderamente kier mira Dios su misericordia den nan bida.
No ta tempo pa bay tras di ningun clase di distraicion, pero ta tempo pa kere y ta obediente na Dios su palabra, pasobra solamente den obedencia na Dios nos por bay dilanti.