Ya nada no por wordo scondi, ni poltica por wordo hunga, nos hubentud mester di ayudo, nos hubentud tin mester di Dios.
*** Cada crimen cu wordo cometi, cada hoben cu wordo asesina cu arma di candela of no, ta un muestra cu nos ta lew for di e caminda di bondad cu nos mester ta.
No ta tempo pa wak kico ta pasando den otro pais , of compara nos mes cu e fenomeno mundial, bisando cu ta tur caminda ta mesun cos esey ta un mentira, laga nos no compara nos mes cu otro pais pero laga nos busca cara di Dios.
Pasobra awendia ta facil pa mira maldad, malicia, inmoralidad, crimen, y otro tipo di bagamunderia abominabel tuma lugar y acepta, apoya, sconde, manipula,y no reconoce e falta di Dios su presencia den nos hogarnan.
Ora nos mira cara di e hobennan cu ta comete crimen, nos ta haci un pregunta, cu por ta ,bo ta keda straña.
* Cuanto hoben mas tin den e situacion aki ta cana rond?
* Cuanto arma a cay den man di hobennan?
* Dicon crueldad a aumenta asina tanto bao di hobennan?
* Kico un hoben ta sinti ora e mata otro hoben.
Acaso ta nos so ta ripara cu e isla aki tin un urgencia, pa yega na Dios?Den un temporada cu a pidi entrega di arma, e uso di arma di candela a aumenta, ningun hende no tin mester di ta un experto criminologo pa nota esey, E cos a bira manera un pelicula.
Ban pone un banda tur politica.
Ban pone un banda tur tira mento di falta riba otro, no sinta wak ta yiu di ken, of cual bario.
Tampoco si e tin scol of no, of e ta bini di famia kibra, of su tata nunca no a crie, of e tin problema mental cu e no por responsabilisa su mes pa su actonan.
Pero ban presenta dilanti di Dios pa ayudo, pasobra manera ta conoci pa nos tur cu ta despues cu un hoben comete un crimen, tur locual ta su situacion mental ta sali na cla y haña un nomber cientifico.
Mientras cu e no comete un barbaridad cruel cu arma di candela ningun hende sa su condicion mental.
Tin hopi manera di rechasa Dios, y un di nan ta cu ora nos tende cu ta solamente Dios por yuda, nos ta keda sin acudi, door cu diabel ta hinca den cabes di hende cu ta religion, ta religioso, ta cos di misa, nan kier cambiabo, pero keda manera bo ta.
Esey ta e mentira mas grandi cu diabel por hinca den cabes di hende, y mas aun ora otro nan cu mester sa mihor ta usa esey como capa pa mantene hende den scuridad.
Dios tey pa tur esnan cu ta kere cu te ainda e por tene misericordia di nos hubentud, di famia, di matrimonio, y rek Su man y yuda nos.
Mescos cu pa hopi aña wega politico y religioso ta wordo hunga cu adiccion, y mira awor te na unda nos ta, awor aki tambe mesun wega ta wordo hunga cu criminalidad bao di hubentud.
Nos ta laga esaki pa tur hende reflexiona y corda riba locual Dios a bisa;
*Si Mi pueblo, cu ta wordo yama na Mi nomber,
*Humiya nan mes,y haci Oracion, y busca Mi cara.
*Y, bira for di nan Mal camindanan,e ora ey lo Mi tende for di cielo, y lo pordona nan pica, y cura nan tera. ( 2 Cronicanan 7:14).