Mundo ta yen di maldad, ta parce manera hende no sa kiko nan kier, hende ta desvia for di caminda di bondad y ta cana den caya di scuridad, caminda nan sa masha bon cu no tin nada bon ta spera nan.
E cantidad di divorcio y famia kibra ta aumenta tur dia, no tin pordon, tin hopi falta di confiansa, hopi manipulacion, y e temor di Dios ta haci hopi falta.
Pero den tur esaki nos kier recorda tur hende riba e bondad di Dios, pa cu hende, pasobra Dios no a cambia.
Salmo 34 vers 5 -8 ta bisa: Nan a hisa cara na djE y keda radiante y nunca nan cara lo keda na berguensa. E pober hende a sclama ,Señor a tende y a salbe for di tur su angustianan.
E angel di Señor ta campa rond di esnan cu teme y ta rescata nan.
Salmo 119:68 ta bisa: Bo ta bon y ta haci bon, siñami bo statutonan.
Como mayor nos mester hala atencion di nos yuinan riba e bondad di Dios pa evita cu caya, orguyo of materialismo por hala nan bay cune den scuridad, pasobra mientras cu bondad ta abunda den Señor tin hende ta proclama maldad manera ta pan nan ta bende, manera cu ta un cos cu mester wordo haci, den tur skina maldad ta wordo promovi.
E responsabilidad di mayor ta aumenta tur dia, y ta pesey Señor ta corda nos riba Efesios capitulo 6 vers 4, pasobra e unico cu por yuda nos preveni pa e hoben no cohe mal caminda ta Señor (Salmo 127 vers 1).
Nos mester duna gradicimento na Señor tur dia, pasobra su misericordia ta pa semper.
Ora nos tin temor di Dios , Señor mes ta warda nos, pasobra hamas lo e laga e hustu desampara.
Su promesa nan ta fiel y nos por depende riba nan, pasobra promesa di Dios no ta promesa bashi di hende.
Dios no tin mester di aprobacion di ningun hende ora e kier bendiciona nos.
Dios ta mira tur cos y e sa tur cos , Dios conoce esnan cu ta fiel na djE.
Su palabra ta bisa: Ki grandi ta bo bondad cu Bo ta warda pa esnan cu tin temor di Bo.
Cu bo a prepara pa esnan cu ta tuma refugio den Bo den presencia di e yiunan di hende!
Bo ta sconde nan den e lugar secreto di bo presencia, pa e conspiracion di hende.
Bo ta warda nan na secreto den un lugar di refugio, pa e lenganan pleistista.
Nos no por compara e bondad di Dios cu nada, pasobra ni plata, oro of diamanta no por supera e bondad di Dios,
Nos mester sigi promove e bondad di Dios pa nos yuinan, pa evita cu nan ta wordo engaña, door di e enemigo, pasobra ta hopi trampa tin awendia pa nos hobennan cay aden cu ta solamente e amor y bondad di Dios por libra nan.
Si nos como mayor cana den e berdad, nos yuinan lo mira e bondad di Dios den nos bida, y nan lo aprecia y desea pa Dios por goberna nan bida pa semper.
Salmo capitulo 23 vers 6 ta bisa : Siguramente bondad y misericordia lo siguimi tur e dianan di mi bida, y lo mi biba den cas di Señor pa semper.
Den Juan capitulo 3 : 16-19, Dios ta mustra su gran bondad pa e mundo henter.