Ay di esnan cu ta yama loke ta malo , bon, y loke ta bon malo,y loke ta scuridad lus, y loke ta lus scuridad, loke ta marga, dushi, y loke ta dushi marga.( Isaias 5:20)
Ay di esnan cu ta campeon den bebemento di biña y hombernan experto den mesclamento di bibida sterki.(Isaias 5:22).
Ay di esnan cu ta hustifica e malbado pa placa pasa bao di mesa, y ta kita derecho di esnan cu ta husto.( Isaias 5:23).
Ay di esnan cu ta hala inikidad, cu cabuyanan di engaño, y pica manera cu cabuya di hala garoshi.( Isaias 5:18).
Y ken cu ricibi un mucha asina den Mi nomber,ta Ami e ta ricibi, ma ken cu haci un di e chikitonan aki cu ta kere den mi trompica, ta mihor pe cu un piedra di molina pisa wordo cologa na su garganta, y cu e wordo hoga den profundidad di laman.( Mateo 18:5+6).
Ay di e mundo pa motibo di e tentacionnan. Pasobra ta inevitabel cu tentacion lo bini: Ma ay di e hende ey pa medio di ken e tentacion ta bini.( Mateo 18:7).
Dios ta un Dios di orden y no un Dios di desorden, e a crea e mundo den un orden, pa asina e mundo por duna alabansa na Dios. Pero e enemigo a sembra desorden, y nos tur ta mirando awe rond mundo e fruta di e desorden.
Hopi biaha prome cu tuma un decision, nos mester tene cuenta, con e asunto aki ta wordo mira den bista di Dios, pa nos no ta un piedra di trompica, pa nos prohimo.
Si un mayor no ta educa, coregi, disiplina, ni tampoco alimenta su yiu corectamente,e ta bira un piedra di trompica pa su propio yiu.
Hopi mucha(hoben) ta den problema pa motibo di e forma di bida y actitud di nan mayornan y asina nan a trompica.
Ora un mayor ta laga un mucha haci manera e kier sin instrui e mucha den e caminda di Dios, nan ta responsabel ora e mucha trompica.
Esun cu ta bisa cu e ta den lus y sinembargo ta odia su ruman, ta den scuridad ainda. Esun cu ta stima su ruman ta permanece den lus y no tin motibo den dje pa trompica. ( 1 Juan 2:9-10).
Laga nos tene bon cuenta cu, Mentira, Odio, Envidia, Orguyo, Falta di pordon y Arogancia ta piedra di trompica den bida di hende.
Tur esnan cu ta rechasa Cristo Hesus , como Señor y Salbador lo trompica, y ta cay bao di condenacion pasobra nan no a kere den e yiu unigenito di Dios (Juan 3:18).
Pesey ta un inmenso dolor pa mira leynan wordo cambia mundialmente,cu lo pone hende trompica awor, y lo pone e futuro generacion trompica, y hasta muchanan di scol lo cana cu dolor, pasobra e sistema di mundo hunto mayornan y mandatarionan a tuma decisionnan contra e palabra di Dios.
Laga nos no lubida locual ta para scirbi den Josue 24:15.
Ma ay di boso, escribanan y fariseonan, hipocritnan, pasobra boso ta sera e reino di cielo pa hende,pasobra boso mes no ta drenta, ni esnan cu ta drentando, boso no ta laga drenta.( Mateo 23:13).
No ta tempo pa nos tuma ningun decision sin consulta cu Dios prome , pasobra nos mester ta un bendicion pa otro, y no un strobacion pa otro.
Si hasta den nos trabao nos tin di tuma un decision contra e Palabra di Dios, nos mester samina nos consenshi y wak kico ta bini prome, Dios of e mundo.