Hopi hende no sa of no tin e conocemento kico ta nifica un ofensa of un falta di respet den direccion di otro hende, y ta pesey nan no ta respeta, y ta ofende hende, manera ta pan cu keeshi, of un custumber di papia pa papia sin tene cuenta ken ta wordo herida.
Esaki ta locual Bijbel ta bisa tocante faltamento di respet Santiago capitulo 3 vers 9+10;
Cune nos ta bendiciona nos Señor y cune nos ta maldiciona hende , kende a wordo traha den e semehansa di Dios. For di mesun boca ta sali tanto bendicion como maldicion . Mi rumannan e cos aki no mester ta asina.Nos no por usa e boca cu nos ta haci oracion cune pa falta respet na oto.
Kico un mucha tin di opina ora e mira hende grandi ta ofende otro? Kico e por siña for di esey, e ta bira parti di su bida, un bida sin respet pa su mes , ni tampoco pa otro, huntu cu un vocabulario ofensivo, cu ta hiba na violensia. Esaki no ta bon pa nos sociedad.
Laga boso palabranan ta semper cu gracia, sasona cu salo, pa boso por sa con boso por contesta cada persona. ( Colosensenan 4:6)
No laga ningun palabra dañino sali for di boso boca , sino solamente palabra cu ta bon pa edificacion, conforme e necesidad di e momento,pa esaki duna gracia na esnan cu ta tende. No haci e Spirito Santo di Dios tristo pa medio di kende boso a wordo seya, pa e dia di redencion.(Efesionan capitulo 4 vers 29-31)
Hopi biaha nos ta tende cu nos por haci e Spirito Santo di Dios tristo awel ta sosode di siguiente forma:
Ora yuinan no ta honra mayornan.
Ora nos ta papia malu di otro.
Ora nos ta ofende otro.
Ora un infieldad drenta matrimonio, pasobra infieldad ta un ofensa contra Dios y hende.
Ora mayornan ta ofende otro y drenta den violencia dilanti di nan yiunan.
Serca Dios ningun hende no tin inmunidad pa ofende otro, asina ta na unda cu bo ofende un hende, sea na cas, oficina, riba caya, dilanti di Dios e ta keda ofensa.
Ningun tipo di ofensa ta bon.( Mateo 5:22 +23).
Ningun posicion den nos bida,titulo of trabao no ta duna nos e derechi di ofende otro hende.
Un mayor no por hinca den su cabes cu su yiunan ta bira su tereno di ofensa, pasobra Dios, ta masha cuidadoso cu muchanan.
Esposo/esposa no por biba ofendiendo otro ( 1 Pedro 3:7)
No tin diferencia entre e trato cu bo ta duna na Dios y e trato cu bo ta duna na bo ruman, pasobra e Palabra di Dios ta bisa:
Si un hende bisa mi ta stima Dios, y ta odia su ruman, e ta un gañado, pasobra esun cu no ta stima su ruman cu e a mira, no por stima Dios kende e no a mira. Esun cu stima Dios mester stima su ruman tambe.(1Juan 4:20-21)
Respet no por bolbe bek serca mucha, si Mayor a lubida con ta practica respet, si den esnan cu mester ta guia, pa nos educacion y mentor di nos futuro generacion e palabra Respet no tey, con nos hubentud por wordo rescata, y aplica e respet tan desea.
Respet ta bin for di cas, pero ora cas faya, nos tin di bay dilanti di Dios, y arepenti, pasobra solamente asina nos por restaura Respet bek.