Un gran berdad a wordo publica, cu tin hopi mucha envolvi den cosnan cu no ta bon.
Hopi mucha cu nan comportacion ta laga di desea,
Hopi mucha cu chens di cay den man di husticia,
Y hopi mucha cu a cay den man husticia,
No lubida cu tin mucha cu pa via di nan mal comportacion husticia tin bista riba nan.
Tur esaki ta noticia doloroso, pasobra ta e muchanan ey , mester dirigi e pais aki mayan cu Dios kier.
Nos no kier dramatisa, pero berdad mester wordo bisa, pasobra ta dificil tapa solo cu un dede, y a yega e tempo pa cada un di nos como mayor cumpli cu e deber cu Dios a bisa pa nos cumpli cune y esey ta pa lanta e mucha den disiplina y instruccion di Señor.( Efesionan 6:4).
Durante temporada di carnaval, nos a scirbi tocante e uso formal di alcohol y droga bao di nos hubentud, con e a aumenta drasticamente, muchanan menor di edad bebiendo tur dia.
Pasobra e manera cu maldad a aumenta , hopi mucha di 13-14 anja tanto mucha homber, como mucha muher, tin un pensamento cu nan ta grandi cada, y cu nan por ta activo den tur cos cu hende grandi ta haci.
Tambe nos a bisa bo cu tin hopi cos cu ta bay sali na cla , y ainda falta, pasobra a yega tempo , pa nos lanta riba y tuma e bida spiritual di nos hubentud na serio.
Nos hubentud mester di lidernan y mentornan serio, no hende nan cu ta busca fama pa nan mes.
Pero hende cu nan bista ta fiha riba Dios, y nan curason ta yena cu amor di Dios, pa haci tur locual ta posibel pa guia nos hubentud riba caminda di Cristo Hesus.
Hesus a bisa laga e muchanan, bini serca Mi, Hesus ta stima tur mucha, nos muchanan ta altamente aprecia den bista di Señor.(Marco 9:42).
Awor como mayor nos ta zorg pa nos yuinan tin tur cos, cuminda riba mesa, paña pa nan bisti, un bon cas pa biba aden y un bon cama pa nan drumi, pero awor dicon nos ta neglisha e presencia di Dios, pa nan bida?
Dicon nan ta bay tur caminda, y ora yega e momento pa bishita cas di Dios, cos ta tranca, acaso ta pasobra nos mes como mayor no ta duna e ehempel di biba pa Dios?
Si nos como mayor no haci oracion pa nos yuinan, ta ken nos kier pa hacie. Si nos no pone ordo disiplina, respet y corecion den bida di nos yuinan ta ken mester hacie pa nos?
Ta kico mas mester sosode, pa nos wowo habri y pa nos sclama na Dios, pa bida di nos yuinan.
E noticia a wordo publica, y no ta awor e asunto aki a sali for di man.
Laga nos haci oracion pa lo siguiente:
Pa nos hubentud entrega nan bida na Cristo Hesus.( Romanonan 10:9-10).( Juan 3:16).
Pa proposito di Dios den bida di nos yuinan ( Jeremias 29:11).
Pa bon amistad ( 1 Corintionan 15:33).
Pa un mente renoba ( Romanonan 12:2).
Pa nan por biba den Puresa (1 Pedro 1;5).
Pa nan por tin pasion pa sirbi Dios.(Galationan 5:24-26).
Pa nan no laga amor pa placa tin dominio riba nan bida ( Hebreonan 13:5).
Pa nan honra na mayornan ( Efesios 6:1-4).
Pa un bon crecemento Spiritual ( Efesionan 3:16-17).
Pa Dios duna nan discernimiento ( 2 Corintionan 2:11).
Pa nan tin speransa den Cristo Hesus ( Efesionan 3:14-19).