Den tur instituto cu ta traha cu mucha, of fundacion cu ta traha cu mucha e autoridad di mayor mester ta conoci y respeta, pasobra Dios a establece e autoridad di mayor. Asina cu autoridad di mayor ta debilita, norma y balor ta baha den famia, cu tur consecuencia conoci.
Dios ta usa autoridad pa trece ordo y husticia den mundo, pasobra Dios ta e autoridad Supremo y mayor riba tur cos.
Dios a establece tres tipo di autoridad den un pais.
Esun di Gobierno.
Esun di Husticia.
Esun di mayornan.
Nan tur 3 mester cana den e linja di berdad y respet pa Dios, y no cambia nada cu Dios a establece, pa evita cu libertinahe ta drenta den e poblacion, inmoralidad ta purba domina, asina hende por cuminsa pensa cu nan por haci locual cu nan kier sin ningun clase di respet pa Dios y su autoridad estableci.
Gobierno tin cu haci tur esfuerso pa cumpli cu su deber na e pueblo, pa asina e pueblo por cumpli cu su parti y pas por reina tur den tur cas. ( Esaki no ta politica pero seriedad) .
Husticia mester para firme y fuerte pa controla, y pone orden y respet.
Mayornan tin e labor di lanta yuinan conforme na e palabra di Dios, pa asina nan no trompica ni cu husticia, ni tampoco cu leynan estableci pa gobierno.
Tocante e 3 autoridadnan aki por wordu lesa den Romanonan capitulo 13 completo y 2 Corintionan capitulo 13:1-10. Pasobra asina cu un ta debilita e otronan tin cu reforsa.
E autoridad di Mayor, no por wordo neglisha tampoco manipula,pa e Famia no tambalia.
Tur insituto cu ta traha cu mucha, tur fundacion cu ta traha cu mucha, tur scol, y tur creche,mester pone den nan statutonan cu autoridad di mayor ta estableci pa Dios, pasina muchanan lanta cu respet pa nan mayornan.
E autoridad cu Señor a duna mayornan ta pa Edificacion y no pa destruccion.( 2 Corintionan 13:10).
Poverbionan 19:20 ta para scirbi: Disiplina bo yiu mientras cu tin speransa ainda y no desea su morto.
Un mayor mester eherce su autoridad ta riba lo siguiente: ( Riba tur cu ta biba bao di su dak)
E mester ta na altura, cu ken su yiu ta sali y na unda e ta bay.
E mester controla su yiu su tas, su camber, y si tin mester hasta su telefon.
Awendia droga ta wordo bendi y entrega nas cas mescos cu Pizza.
E mayor tin tur autoridad pa puntra e mucha kico e tuma serca hende na auto y exigi pa e mucha habri su man pa e wak y si ta droga denuncia inmediatamente.
Ningun mucha no por sali cu spirito, e persona cu e ta sali cune, mester ta conoci.
Mayor su deber ta zorg pa alimentacion,bistimento, gasto di estudio, pero mas cu tur cos edifica e mucha pa un bida decente y agradabel den bista di Dios y di hende.
Colosensenan 3:20+21 ta para scirbi: Yuinan sea obedecido na boso mayornan den tur cos,pasobra esaki ta agradabel na Señor. Tatanan no provoca boso yuinan pa nan no perde animo.( Efesionan 6:1-4).
Deber di mayor ta pa encurasha, edifica, y no kibra e muchanan, pasobra nos tey como esnan yama prome pa motiva nos yuinan tur dia, pa haci oracion, pa hala nan riba caminda di Dios.
Ora Dios duna bo autoridad e ta yama bo pa duna cuenta, pasobra Dios kier pa tur mayor ta responsabel pa nan yuinan.
