Famia a wordo institui door di Dios mes, tur hende na mundo ta bini di un famia, tur hende a nace for di un homber y un muher, ta na nan dos Dios a duna e autoridad di por multiplica y yena mundo cu ser humano.
E enemigo di nos bida cual ta e diabel, no ta contento cu esey, su plan ta pa caba cu poblacion, treciendo, malesa, pester, guerra, odio, maldad y mas cu tur pica den e poblacion mundial, pasobra e sa cu pica ta aleha hende for di Dios, y esaki no ta nada di sconde, pasobra mas hende distancia nan mes for di Dios, mas hende lo ta den e reino di scuridad , y na final mas hende lo wordo destina pa fierno.
Cuanto divorcio, cuanto abandono di hogar, cuanto rechaso di yuinan, tur esey ta coopera na destruccion di famia.
Famia ta e pilar social di un pais, hopi biaha nos ta tende di pilar economico, pero si no tabatin famia, no tin sosten pa e pilar econimico, pasobra lo no tin hende pa traha, y economia ta hende ta pone move.
Pero manera ta para scirbi cu den e ultimo tempo hende lo bira stimado di placa mas cu Dios, y esey ta tumando lugar. ( 2 Timoteo 3:1-5).
Nos tur ta yama pa, aprecia, gradici, honra, y bendiciona nos famia. Famia mester wordo stima pa tur hende, pasobra Dios ta stima famia. Ta un mandato di Dios, pa stima Dios riba tur cos y bo prohimo manera bo mes.
Dios su palabra ta bisa lo siguiente:
Mira ki bon y bunita ta pa rumannan biba hunto den harmonia.( Salmo 133:1).
Mira,yuinan ta un herencia di Señor, y fruta di barica ta un recompensa.( Salmo 127:3).
Esaki mester ta e deseo di tur mayor pa nan yiu:
Mi yiu si bo curason ta sabi,e ora ey mi curason tambe lo keda contento, si mi alma lo regosiha,ora bo lipnan papia loke ta corecto.
No laga bo curason envidia pecado, ma biba semper den e temor di Señor.
Siguramente tin un futuro, y bo speransa lo no wordo corta kita afo.(Poverbionan 23:15-17).
Un mayor mester desea, declara y profetisa bondad pa su yuinan,pasobra Dios a pone autoridad den boca di mayor, pa asina yuinan por wordo encurasha y no descurasha.
Nos ta stima pasobra E a stima nos prome. Si un hende ta bisa: Mi ta stima Dios, y ta odia su ruman, e ta un gañado, pasobra esun cu no ta stima su ruman cu e a mira, no por stima Dios,kende e no a mira. E mandamento aki nos tin di dj’E, cu esun cu ta stima Dios mester stima su ruman tambe.(1 Juan 4:19-21).
A bira manera un custumber pa hende exprecia odio contra otro, e palabra odio ta wordo expresa den famia, trabao, politica, hasta door di muchanan, pero e no ta totalmente un bon expresion ni tampoco un bon pensamento.
Pasobra e pa palabra di Dios ta bisa lo siguiente pa tur hende tene cuenta cune;
Ken cu ta Odia su ruman, ta un matado, y boso sa cu ningun matado no tin bida eterno ta permanece den dje.( 1 Juan 3:15).
Ta pesey nos mester arepenti y pidi Dios pordon pa cada biaha cu nos expresa odio contra nos prohimo.
Boso soporta otro y pordona otro, si un di boso tin un keho contra otro, mescos cu Señor a pordona boso. Asina boso tambe mester haci.( Colosensenan 3:13).
Laga e pas di Cristo goberna den boso curason.
Biba na pas cu otro.