Reconciliacion cu Dios ta hopi importante pa nos bida, nos cas y nos famia. E ta asina importante cu den 2 Corintionan 5:20 Pablo ta roga tur hende pa sea reconcilia cu Dios pa medio di Cristo Hesus.
Esaki no ta djis un yamada, pero ta un grito di alarma y aviso pa henter nos poblacion, incluyendo tur autoridad, tur organisacion, y especialmente tur nos gobernantenan.
Pa un Matrimonio ta firme, e pareha mester reconcilia cu Dios, pasobra Dios ta duna sabiduria na tur esnan cu pidi , pa asina nan por ta fuerte, firme y fiel den tur cos.
Pa un Famia ta bendiciona, henter e famia mester reconcilia cu Dios, pa asina Dios ta para na cabes.di nan hogar. Y asina guia e famia.
Pa un Pais ta bendiciona su poblacion y gobernantenan mester reconcilia cu Dios, sin ningun clase di berguensa pasobra nos tur ta depende di Dios.Ta solamente Dios ta duna sabiduria berdadero.
Dicon nos mester reconcilia cu Dios? Pasobra den tempo di necesidad, ta Dios ta nos unico refugio, y speransa , reconciliacion ta pone nos saca man pa otro, y yuda otro, pasobra tur hende mester stima nan prohimo, y solamente door di reconciliacion cu Dios esey posibel.
Con nos por reconicilia cu Dios?
Si nos confesa nos picanan , E ta fiel y husto di pordona nos, nos picanan y pa limpia nos di tur inhusticia.( 1 Juan 1:9).
Si bo confesa cu bo boca cu Hesus Cristo como Señor y kere den bo curason cu Dios a lant’E for di mortonan, lo bo ta salba. ( Romanonan 10:9)
Pasobra ken cu kere den dj’E lo no keda brongosa ( Romanonan 10:11).
Hende cu no reconcilia cu Dios, ta biba pa nan so y nan mes,cu e pensamento cu no mester preocupa cu otro hende basta nan ta bon.
Nos mester biba manera ruman un cu otro, y sin un reconciliacion cu Dios esey lo no ta posibel, pasobra den reconciliacion tin pordon y esey ta hopi importante pa nos bida spiritual.
Ora nos ta haci oracion, Dios ta demanda di nos pa nos pordona, nos prohimo, pasobra oracion cu hende riba nos curason, ta envano, e oracion no ta wordo scucha.( Marco 11:25).
Dios a establece su oracion di reconciliacion, den tur area di nos bida, hasta na momento di desaster y ta lo siguiente:
Si Mi pueblo cu ta wordo yama na Mi nomber,
humiya nan mes y haci oracion,
y busca Mi cara y bira for di nan mal camindanan,
e ora ey lo Mi tende for di cielo,y lo pordona nan pica y cura nan tera. ( 2 Cronicanan 7:14).
Dios no a cambia, ta hende a aparta for di Dios.
Ora nos reconcilia cu Dios, nos ta bira un criatura nobo, y nos mente ta wordo renoba, y nos ta dispuesto pa traha hunto.
Bendiciona ta e nacion cu su Dios ta Señor, e pueblo cu E a scohe pa su propio herencia.
Rond mundo situacion ta demostra, cu tempo ta dificil, y si nos ta mas uni, nos chens di sobrevivi ta mucho mas grandi, pasobra union ta yama Dios su bendicion.
Pero ora nos uni, nos mester uni di berdad, cu un curason humilde, cu ta demostra e reconciliacion cu nos pasa den dj’E.
Esaki no ta algo facil, pasobra hende cobarde no kier reconcilia, pasobra semper nan ta keda pensa cu otro, hende kier stroba of probecha di nan noblesa .
Reconciliacion ta algo cu mester sosode pa asina nos por hanja solucion,den tur cos, pasobra reconciliacion ta di Dios.
