Pastor Marcel Balootje: Amor sincero ta bini di Dios

Mundo ta conociendo asina tanto maldad cu hopi hende a lubida kico ta amor berdadero, hopi hende tin deseo di wordo stima cu e amor di Cristo Hesus.

E enemigo ta sembrando odio, rencor y amargura tur caminda, y hopi hende ta sigi e caminda ey pensando cu mas mi trata hende malo, mas fuerte mi ta.

Bo ta scucha palabranan manera, ami no ta tuma nada na man di ningun hende.

Ami no ta laga ningun hende uzami. 

Asina nos ta drentando e skina cual e enemigo kier pa nos biba aden, pasobra eyden nos ta bira ciego y nos ta haci mas bochincha y espresa duresa di curason.

Den un cas caminda mayornan ta stima otro, muchanan ta biba alegre, pasobra nan ta mira amor, y amor ta tene hende na cas.Muchanan no ta bay caya , ora nan propio mayornan tin tempo pa nan, y ta aprecia nan bida, y ta haci tur locual ta posibel pa duna nan un bon crecemento y educacion.

Bo tabata sa cu amor ta papia pa hende, hopi biaha bo no tin palabra pa expresa bo mes na bo yuinan, pero bo actitud di respet un pa otro, y e gracia di boso como mayor un pa otro, ta pone cu ora boso no ta na cas e yuinan ta puntra ki ora boso como mayor ta yega.

Ta un cos cu solamente Dios, ta crea den hende, pasobra esey ta e sentimento di e amor berdadero, cu mundo no por ofrece, amor berdadero di Dios no ta bini cu ningun terapia di mundo, pasobra Cristo Hesus ta e esun cu a entrega su bida pa nos tur , pa asina nos conoce Su gran amor.

Esun cu ta stima su prohimo ta stima Dios.

Amor ta un expresion di obedencia na Dios, pesey ta haci Dios dolor ora cu nos ta kibra otro, menosprecia otro, discrimina otro, pone otro trompica, rebaha otro, pasobra den tur esey nos ta demostra con leu e diabel tin dominio den nos bida.

Ora nos ta uza pasado di otro como un kruk pa tene lanta na dje, ora bo ruman su caida ta un goso pa bo, pasobra bo ta asina envidioso di su crecemento, cu bo ta biba sperando un momento cu e por faya y pa bisa “Mi tabata sa esey”.

Amor ta siña nos pa duna hende oportunid den bida , mescos cu nos kier Dios duna nos oportunidad, ora nos faya y kier lanta cabes bek ariba.

Cada biaha cu nos pordona nos ta demostra cu nos ta yui di Dios, pasobra ora nos no porsona nos prohimo, Dios tampoco ta pordona nos( Mateo 6:14-15) y cada biaha cu nos ta haci oracion laga nos pordona si nos tin algo contra un hende ( Marco 11:25) pa asina nos Tata cu ta den cielo tambe pordona nos.

Laga amor ta sin hipocrecia, aborese loke ta malo, tene firme na loke ta bon.Stima otro cu amor fraternal, duna preferencia na otro den amor. No flakia den diligencia, ma sea ferviente den spirito sirbiendo Señor. (Romanonan 12:9-11).

Y pakico boso ta yama mi Señor, Señor y no ta haci locual mi ta bisa. Ken cu bini serca Mi y tende Mi palabranan y haci nan, lo Mi mustra boso cu ken e ta igual.

Nos amor no mester ta di palabra so, pero di hecho tambe, cada biaha cu bo tin chens di comparti pan cu bo ruman hacie, pasobra esey ta boluntad di Dios.