Ta un gran berdad cu tur hoben mester sa , pasobra a yega tempo pa papia mas cla y habri posibel cu tur nos hobennan.
Hobencita/hobencito bo dignidad no ta depende di un condon, e pida plastic cu a causa y ta causando hopi libertinahe, bao di nos hubentud y cu a pone hopi hoben perde nan dignidad, respet y moral, pa tuma decision descabeya door di entrega nan mes sexualmente na un persona cu despues a resulta di no ta balora nan, ni tampoco por responsabilisa su hecho.
No ta bay pa e asunto si bo sali na estado of no, pasobra hopi hende ta kere cu condon ta cubri inmoralidad, absolutamente cu no, e asunto ta honor y respet pa bo mes, y tambe pa bo mayornan cu ta spera lo mehor pa bo.
No ta un secreto cu den tempo di carnaval , dominio propio di hopi hende ta baha, tanto di hende grandi como di hobennan, pa tanto uso di alcohol y droga, sensualidad , perversidad, y e exposicion di partinan delicado di curpa cu ta tuma lugar.
Pero nos tin di corda nos hubentud y tambe hende grandi lo siguiente:
O boso no sa cu boso curpa ta tempel di Spirito Santo, kende ta den boso.Kende boso tin di Dios, y cu boso no ta pertenece na boso mes.
Pasobra boso a wordo cumpra pa un preis: pesei glorifica Dios den boso curpa.( 1 Corintionan 6:19-20).
E balor cu e curpa humano tin ta asina precioso, pa Dios y hende mester siña balora locual cu nan tin
pasobra no lubida cu ta Dios mes a formabo den barica di bo mama. E curpa no ta pa inmoralidad ma pa Señor y Señor pa e curpa.
Wak cuanto trampa e enemigo tin pa destrui curpa di hende, droga, alcohol,paranda,inmoralidad sexual, violencia, abuso sexual y fisico. ( Juan 10:10).
Pero mas cu esey ta bo integridad, bo desencia, cu bo mester tur dia tanto awe , y como den futuro, pesey ta hopi importante pa balora e curpa cu Dios a duna bo, y respeta bo mes pa asina otronan respeta bo.
Ta bon pa preveni embaraso hubenil, pero abstencion di tur sorto di relacion sexual iresponsabel , ta nifica excelencia, un derota pa diabel , y un victoria den Cristo Hesus.
Señor mi sa cu e caminda di e hende no ta di e mes,tampoco no ta keda na hende pa dirigi su pasonan.( Jeremias 10:23).
Pa agrada Dios ningun hende no tin mester di balia vulgar , ni tampoco balia exponiendo nan partinan delicado na otronan, esey ta un tipo di idolatria cu hende ta pone pa nan mes, y asina halsa nan mes.
Mi no por dicidi pa mi mes, pasobra mi no ta di mi mes, si mi ta sinti un dolor, Dios lo yuda mi.
Si un cabey cay for di mi cabes, mi no por cohe pone bek na su lugar.
Si mi perde un djente, mi no por pone un otro djente nace bek.
Ora mi lanta mainta , ta Dios a duna mi un dia nobo, y no ta mi wekker a zona duro spierta mi.
Si mi curazon stop di bati , bida a caba pami, pero Dios den su misericordia por pone mi curazon bati bek.
Mi no por hala rosea di mi mes si Dios no dunami rosea.
Tur esaki nos mester tene cuenta cune prome cu nos bisa’’ ami ta dicidi’’,pasobra ta Dios ta dicidi.
Si bo ta bay tuma un decision cu ta bay contra boluntad di Dios, stop inmediatamente.