Pastor Marcel Balootje: Alerta: Mayornan, ban encurasha nos yuinan riba bon caminda

Dios stima tur mucha, y e a encarga nos cu un Famia, pasobra for di matrimonio ta bini un famia, y Dios ta yama nos como mayor pa nos ta responsabel pa nos Famia.

No ta desconoci pa nos cuanto enemigo e famia por tin, y si nos no habri wowo, e diabel lo cohe ventaha, y asina dividi e famia for di otro.

Un paar di anja pasa nos tabatin mas cu 4 crimen comete door di hubentud cuminsando for di e prome luna nan di aña, awel den nomber di Cristo Hesus ,Dios yuda nos, pasobra nos como mayor, mester presenta nos oracion dilanti di Dios pa E cuida di nos yuinan.

Na prome lugar laga nos yena nan cu amor di cas, y cu e Palabra di Dios, pa nan por tin resistencia contra tur plan di e enemigo. Laga nos cas ta un lugar sano y agradabel pa nos yuinan por biba, pasobra ningun hende por biba constantemente den bochincha y violencia.

Nos hubentud mester ta na altura di lo siguiente:

No laga ningun hende menosprecia bo hubentud, ma mas bien den conducta, amor, fe, y puresa, desmostra bo mes di ta un ehempel, pa esnan cu ta kere.(1 Timoteo 4:12).

Pero pa un hoben demostra decencia, disiplina, bon conducta y puresa e mester ricibi esey for di cas.

Pesey un biaha mas nos mester recorda tur hende, pa stima bo matrimonio y bo famia, stima bo yuinan, sea bo ta mama soltero, of tata soltero, corda cu bo yuinan ta un regalo di Dios.

Tur dia ripiti esaki pa bo yuinan custumbra cune:

Laga tur amargura,furia,rabia,griteria,y calumnia,wordo kita for di boso, huntu cu tur malicia. Y sea cariñoso cu otro, misericordioso,pordonando otro, mescos cu Dios den Cristo tambe a pordona boso.( Efesionan 4:31+32).

Con nos hobennan su mente por yena cu malicia?

Ora nos mes como mayor no ta comporta decente y recto na cas.( Mentira . Adulterio, violencia relacional,alcohol, droga y arma)

Canando cu mal amistad, ( 1 Corintionan 15:33)

Scuchando canticanan perverso, cu mensahe sexual ,cu ta venena nan mente, cu inmoralidad.

Canticanan di violencia especialmente Rap.( cualnan ta pasa di telefon pa telefon)

Weganan di violencia riba internet.

Cartoons di dobbel animo y cu figuranan diabolico,

Orguyo , Arogancia, y falta di respet, cual no ta wordo coregi na cas.

Peliculanan cu ta obtenibel den tur format, di tur tipo di relacion sexual ta wordo presenta, contaminando e mucha su mente y su curason.

Videonan musical cu ta mas erotico( seductivo) cu nan ta musical.( Y cu ta wordo presenta tur momento na t.v).

Usando marihuana y otro droga tur dia.

Observando tur esaki, cu nos trabao como mayor ta hopi grandi y cu nos tur mester di ayudo di Señor. Pasobra diabel kier influencia nos yuinan pa desaster.

Pasobra tur esnan cu ta wordo guia door di e Spirito di Dios esey nan ta yuinan di Dios.( Romanonan 8:14).

Pesey nos mester tin Señor na prome lugar den nos cas, si nos kier tin yuinan, serio, decente, puro y integro, pasobra no ta existi edad pa integridad.

Ta tempo pa nos tur realisa cu ta dificil lanta un Famia sin e presencia di Dios, den nos bida, nos cas, y nos famia, no ta tempo pa wega, e ladron a bini pa horta mata y destrui. (Juan 10:10).

Oracion;

Señor nos ta pidibo den nomber di Cristo Hesus, pa Bo manda Bo yudansa pa tur e mayornan cu ta pasando den dificultad , cu nan yuinan, y duna nan amor y sabiduria, pasobra Abo ta Dios di misericordia, y laga bo pordon alcansa tur hogar.