Den e buki di Ezequiel capitulo 36 vers 26-27 Señor ta bisa : Ademas lo Mi duna boso un curazon nobo y pone un spiritu nobo den boso. Lo Mi kita e curazon di piedra for di boso carni, y duna boso un curazon di carni.
E palabra di Dios tin poder den nos bida , y e palabra di Dios por haci e cambio cu hende no por haci, mescos cu hopi biaha den un cas e mayornan ta duna un mucha un regalo, of locual e ta desea pa asina e comporta su mes bon, y pa mustra cu nan ta contento cu ne.
Pero tempo y dia lo mustra cu regalo por cumpra curazon, pero solamente palabra di Dios por cambia curazon.
Pasobra ta berdad cu curazon ta engañoso, y cu hopi biaha hende ta bay tras di nan deseo y tras di nan emocion, y aparta for di e palabra di Dios, cual ta hiba nos riba e caminda corecto.
Nada no por reemplasa e palabra di Dios den nos bida, pasobra ta solamente e palabra di Dios por saca nos for di scuridad y trece nos na e luz.
Ora nos como mayor balora e palabra , y cuminsa mustra nos yuinan e caminda di berdad y bida nos lo mira e resultado cu solamente Dios por ofrece.
Ningun regalo, ningun viahe, ningun auto luho, cas grandi, placa na banco, no por ta mas grandi cu e amor cu Dios ta ofrece, pasobra tur otro cos ta temporal, mas e amor di Dios ta eterno.
Nos ta bibando den un tempo cu hopi famia ta man na cabes y ta puntra con mi tin di haci cu mi yiu, e a bay for di man y con mi por trece bek , pa e trankilidad den cas y pa scapa su bida, pasobra hopi hende ta mira cu si e hoben sigi riba e caminda negativo no tin futuro pe,
Den Salmo capitulo 51 vers 10-12 David a pidi Señor: Crea den mi un curazon limpi, O Señor, y renoba un spirito recto den mi. No tira mi for di Bo presencia,y no kita Bo Spirito Santo for di mi, dunami atrobe e goso di Bo salbacion y sostenemi cu un spirito boluntario.
Esaki ta e oracion cu David a haci despues di a cay den pica, pasobra David a realisa cu ta solamente Dios, por a libre di berdad for di e caminda di maldad.
Awendia tin hopi terapia traha pa man di hende, pero masha poco di nan ta yega na e curazon, pa e curazon di berdad wordo cambia, pasobra solamente arepentimento y aparta for di maldad por trece cambio y solamente Dios por hacie.
Nos yuinan tin derechi di ricibi e palabra di Dios y nos como mayor mester duna tur cooperacion pa esey, pasobra nos tur ta mira e realidad den nos hubentud, ora e palabra di Dios ta ausente .
Proverbionan capitulo 2 vers 6+7 ta bisa: Pasobra Señor ta duna sabiduria, for di Su boca ta sali conocemento, y comprendemento, E ta warda sabiduria sano, pa esnan cu ta recto, E ta un escudo pa esnan cu ta cana den integridad,
Aki nos tur como mayor tin cu realisa kico Dios ta ofrece nos yuinan, pasobra mundo y scuridad ta ofrece hopi cos, pero tur ta hiba na tristesa y destruccion, pero e cambio real den bida di un hoben ta Dios so por hacie.