Den Mateo 24 Cristo Hesus a spierta nos di rumor, rumor ta un mal spirito cu ta haci daño na hende , na bo cas, y hasta na un pais.
tin tres cos cu rumor ta personifica.
a) Rumor ta Sinberguensa, e no ta interesa cuanto hende wordo perhudica of engaña, of cuanto hende muri mes..
b) Rumor ta Traidor semper e ta actua tras di lomba di hende cu falsedad, y cu intriga y odio, pasobra hopi biaha rumor ta sembra Odio.
c) Rumor ta Golos e kier gara mas tanto hende posibel den su trampa di mentira, pasobra mayoria biaha den Rumor no tin berdad.
Rumor ta busca fama, y hopi biaha e ta usa hende di fama , pa haci su trabao, y ta esey nos Señor Hesus kier spierta nos.
Nos ta den e tempo di hopi rumor, y ta tempo pa nos hala mas serca Dios.
Ta tempo pa nos busca Su cara, ta tempo pa oracion y ayuno.
Ta tempo pa busca curashi, ta tempo pa planea, ta tempo di vishon nobo.
pero ta ken ta esnan cu ta ricibi vishon nobo den e tempo aki, esey ta esnan cu no ta bay tras di rumor.
Nos ta bibando den un tempo cu diabel tin hopi mente domina,cu miedo y tur otro tipo di cos. descurashamento, ta otro tipo di spirito malo cu ta suta nos pueblo, treciendo desanimo, casi e por bisa bo pa no haci nada mas , pero sinta un caminda warda morto, pasobra tur pora ta sera, pero awe nos kier bisabo pa bo hisa bo bista na cielo, for di unda bo yudansa ta bini.
Como mayor bo ta pensa kico lo pasa cu mi yiunan, con nos ta sigi biba, con ta cu mayan, na unda nos lo bay, cuanto hende no ta bisa ay mi por mas, mi ta cansa , mi ta fada, mi ta malo, mi tin problema. Y cada rato bo scucha medionan di comunicacion, y bo habri bo telefon of subi riba facebook, whattsup, etc bo ta hayabo confronta cu un rumor, Pasobra Hesus a spierta nos di esaki. Den Nehemias Capitulo 6 vers 8 Nehemias a reconoce e plan di e enemigo, y a contesta na Tobias, Shambalat, y Gesem cual tabata enemigonan di Jerusalem, cu locual cu nan ta manda bise lo no bay sosode, pasobra ta nan curazon a inventa esey. Y awor den e tempo aki tin hopi hende ta inventa maldad den nan curazon, y ta expresa esey sin miedo segun 2 Timoteo Capitulo 3 vers 1 te cu 4. solamente cu e anhelo pa haci otro daño, y hasta den e tenpo aki tin hende ta haci uso di versuculo biblico, pa asina corumpi e Palabra y logra nan meta di maldad. Ay ta un dolor mira con Famia ta wordo kibra pa motibo di rumor, con hende ta cay den desobedencia na Dios pa motibo di rumor, con economia di paisnan ta wordu bringa cu rumor. Si bo tende un rumor y bo keda ripiti mesun cos cada rato , e rumor ey ta drenta bo mente, y ta baha den bo curazon, y asina trece stress y depresion den bo bida y bo hogar.
Rumor cu bo lo perde trabao, rumor di escases di cuminda, hende a cuminsa hunga rol di Dios, hende kier haci doño di algo cu no ta di nan, hende ta haci mal uso di nan posicion, pa manipula hende, hende ta haci manera ta depende di nan cu bo tin bida of cuminda, of placa, hende pa medio di rumor ta eclavisa otro hende su mente, pa ponebo kere cu si nan no yudabo, bo ta muri di hamber, y tur esey ta a base di Rumor.Ta pesey haci bo bida , bo hogar, y Famia Rumor-free, door di deposita bo confiansa den Dios todopoderoso, sabiendo cu ora bo pone bo fe den Dios lo no falta cuminda riba bo Mesa.Tambe Dios lo ta bo defensa, E lo ta bo refugio, Dios nunca lo laga bo bandona. Pasobra rumor lo no stop, pero cu bo bista fiha riba Cristo Hesus, bo Fe lo aumenta, y segun bo fe ta aumenta, ta dificil pa bo wordo manipula, ta dificil pa depresion bishita bo. y ta dificil pa bo permiti hende hunga rol di Dios den bo bida.
Hesus a bisa cu nos lo tende di rumor, si hopi rumor, rumor cu kier domina, rumor cu kier cumpra bo mente cu kier sacabo for di bo Fe, pasobra tin hende cu lo bin pretende cu nan ta Dios, y ta haci manera sin nan bo no por logra.Pero para duro den bo Fe, como mayor centralisa bo bista riba Hesus.Dune tur honor y Gloria, Sera bo wowo y oido pa rumornan falso cu kier danja e ambiente den bo hogar, y trastorna bo famia.
Dios tene misericordia, y cubri nos bao di e sanger di Hesus.
Sinceramente
