Ta masha importante, pa nos guia nos yuinan den caminda di Dios for di chikito, pa evita asina cu segunnan ta crece e diabel ta horta nan for di nos.
Tene cuenta cu e ladron ta bon pa horta mata y destrui, y e no tin cuenta cu yiu di hende, ta pesey Hesus a bisa pa laga e muchanan bini serca dje pasobra di nan e Reino ta, esey ta nifica cu mas tempran nan curazon ta habri pa Dios mas mihor nan crece.
Awendia mayornan ta interesa pa nan yiu ta den ciencia y technologia, pero locual nan ta lubida cu ciencia y technologia nunca por supera e poder di Dios, pasobra ta Dios a crea tur cos, hasta ciencia y technologia, pesey nos tin di tene cuenta y no lubida riba Dios.
Bendiciona ta e mucha cu ta siña bon na scol pero tambe e tin Cristo Hesus den su curazon , pasobra esey por libre for di e gara di e enemigo.
Nos mester siña nos yuinan for di chikito , pa pordona, respeta, sea obediente,no tene otro na curazon, y si bo a haci un fout pidi despensa,
Pasobra hende cu ta pidi despensa ta demostra educacion, y despensa no ta kita nada for di hende, pero e ta demostra madurez.
Den Mateo capitulo 19 vers 14+15 ta para scirbi: Ma Hesus a bisa laga e muchanan, y no stroba nan di bini serca Mi,pasobra e reino di cielo ta pertenece na esnan manera esakinan. Despues di a pone su mannan riba nan E a bay for di eynan.
Nos tur ta altura cu nos muchanan ta victima di abuso , sea den famia of pafor di famia, nos mester haci tur locual ta posibel pa vigila, kico ta pasando cu nos yuinan.
Pero mas ainda nos mes no por ta piedra di trompica pa nos yuinan, por ehempel:
Ora Mayor ta bebe y droga y causa problema na cas cu muchanan,no por drumi anochi.
Ora Mayor kier pleita y bringa cu nan propio yiu.
Ora Mayor no ta cumpli cu debernan di cas.
Ora Mayor dicidi cu nan ta bira infiel, kibra famia, y despues muchanan no tin caminda di keda, y tambe nan lo hanja falta di mama of tata, esey ta e parti tristo cu hende grandi tin di compronde cu nan mal actitud por causa tropieso pa nan yuinan.
Si nos no tene cuenta nos mes ta dirigi nos yuinan den un caida, y enemigo lo para brasa habri warda nan, esey ta sosode ora nos ta malcria mucha, cu tur su consequencia.
Tin un excuus awor aki cu mayoria di e muchanan cu tin problema ta bini di casnan por ehempel cu ta falta tata den cas, pero esey no ta kita cu e mama tin di pone ordo, pasobra awendia tin hende ta bira mama soltero accidentalmente, pero tin tambe cu ta scoge pa bira mama soltero, pero nan ta lubida cu mesterr educa e yiu.
No ta pornada e palabra di Dios den Galationan 6 vers 7 cu tur locual hende sembra nan lo cosecha, placa no ta drecha ningun yiu rebelde, locual ta drecha nan ta Palabra di Dios, displina y coreccion, cu ta locual cu e mayor mester duna.
Awendia hopi mucha ta riba caya atardi, pasobra Mamai y Papai ta den Gym, nan tur dos kier tene curpa den forma, mientras aya banda diabel ta desforma nan yuinan.
