ORANJESTAD,Aruba
Ayera nochi nos prome Minister Eveline Wever-Croes a informa cu Aruba ta drentando un fase nobo. Un fase unda ta bay cuminsa traha cu un “Strategia di salida” cu mester wordo desaroya y implementa pa saca Aruba for di e crisis di COVID-19.
Pa Aruba sali for di e crisis ta nesesario pa comercio y otro instancianan cuminsa funcciona atrobe. Pero esaki mester sosode bou di condicionan cu ta reduci e riesgo pa transmicion di e virus. Na e momento aki e strategia cu Gobierno a skohe pa maneha COVID-19 na Aruba ta dunando resultado y ta importante pa sigui monitor y ahusta e strategia unda ta nesesario. Ta hopi importante pa desicionan cu ta wordo tuma ta abase di datos y no abase di sentimento of presion externo.
E prome paso pa saca Aruba for di e crisis aki ta ensera pone nos economia interno cuminsa move. Poco poco tur instancia y negoshi ta cuminsa funcciona y hendenan lo cuminsa traha bek. Esaki lo sosode den fase y cu condicionan. Di e manera aki nos ta inicia e proceso pa recupa Aruba su economia y futuro.
Gobierno ta cumpli cu su tarea pa evalua cada senario pa garantisa cu cada desicion ta uno resposabel. Pero e desafio mas grandi ta nos comunidad. Nos cominidad mester tin e sentimento di responsabilidad propio pa cu cuido di nan salud na tur momento. Comunidad mester bira mas conciente di cada situacion y senario den nan bida diario y evalua nan desicionan abase di e risico pa contrae e virus.
COVID-19 lo no disparce for di e mundo aki mas y tanten cu no tin un vacuna pa e virus nos tin pa sigui biba protehando esnan mas vulnerabel pa e virus. Higiena di man lo bira un actividad frecuente y aglomeracion di hende lo mester wordo regla na tur momento cu distancia fisico di 2 meter.
