E organisashonnan Nos ke Boneiru bèk, Human Rights Bonaire i Movementu pa Kambio a organisá di 29 di novèmber pa 4 di desèmber un importante simposio titulá ”8th Symposium – Contemporary Colonialism & Reparations in the Caribbean”
Dr. René Rosalia lider politiko di Movementu Kousa Promé tabata un invitado spesial di e organisadónan. E mester a tene dos presentashon: “Despensa di Hulanda i Reparashon den Caribe i Kon un partido polítiko por sostené i desaroyá demokrasia de un pais.”
Tambe a forma parti di e delegashon di Movementu Kousa Promé sekretario sra. Indira Boelbaai i presidente drs. Ellen Maduro Jeandor kende tabata enkargá ku apertura ofisial di e seshon di e simposio ku a trata diskushon polítiko di hubentut.
Chief Igbo Marlon Regales tambe tabata un invitado di Kòrsou na e simposio. Otro invitado di Kòrsou tabata Tyrone Brunken.
Meta di e simposio tabata: Trese unión bou di paisnan di Caribe ku ainda ta kolonia òf semi kolonia. Tambe pa pensa huntu riba strategia i solushonnan pa e problemátika di dekolonisashon i reparashon aki den Caribe.
Paisnan invitá na e simposio aki tabata San Andres/Providencia/Santa Catalina, Kòrsou, Mexico, Aruba, Sint Eustatius, US Virgin Islands, Puerto Rico, Sint Maarten, British Virgin Islands, Bonaire, Barbados, Republica Dominicana i Peru.
Na e simposio aki tabata tin algún invitado importante di hopi peso. Ta trata di chief dr. Eric Phillips ku ta vise presidente di e Komishon di Reparashon di CARICOM. E ta tambe presidente di Komité di Reparashon di Guyana i miembro ehekutivo di Asosiashon di Kultura i Desaroyo Afrikano.
Otro personahenan importante di peso ku tabata invitá na e simposio ta representantenan di COPPPAL. Ta trata di e arubiano Joe Koolman presidente di Komité di Dekolonisashon di COPPPAL i Jorge Garcia Cordova sekretario ehekutivo athunto di COPPPAL.
Otro gran personahe ku tabata presente na e simposio ta dr. Carlyle Corbin konsehero internashonal i eksperto di Nashonnan Uní. E ta e arkitekto i konsehero prinsipal di Boneiru. Dr. Carlyle Corbin a logra konvensé Nashonnan Uní pa pone Polynesia bèk riba lista di paisnan ku no tin gobernashon propio. E speransa ta ku próksimamente Boneiru lo sigui e pasonan eksitoso di Polynesia.
Un paso stratégiko sumamente importante ta e echo ku James Finies a logra konvensé COPPPAL pa habri un ofisina regional na Kralendijk Boneiru.
Komo broche di oro por konsiderá lantamentu ofisial di e partido di James Finies PUEBLO PROGRESIVO i UNI. E partido aki lo manehá e ofisina regional di COPPPAL na Boneiru.
Ku su peregrinahe di mas ku 500 dia den Caribe i Latino Amerika James Finies huntu ku Davika Bissessar di Human Rights Bonaire a logra duna e lucha di Nos ke Boneiru bèk un kobertura internanshonal. Rònt Caribe i Latino Amerika ta awendia na altura di kolonialismo hulandes den Caribe. E lucha di Boneiru pa rèspèt pa su derechi di outodeterminashon i pa hustisia i igualdat ta awor den man di paisnan di Nashonnan Uní pa ser husgá. Otro logro ta ku e Komishon di Reparashon di Caricom, a aseptá Boanire Human Rights Foundation komo miembro asosiá den e Komishon
Boneiru ta dilanti den e lucha di dekolonisashon i mester ta un ehèmpel pa Kòrsou, Aruba, Sint Maarten, Saba i Sint Eustatius. Pa Kousa Promé e lucha di dekolonisashon mester bira un lucha sagrado di tur seis isla kolonia hulandes.
E di nuebe simposio lo tuma lugá otro aña na San Andres den luna di yüli.
