Boneiru a partisipá na e Green Overseas Climate Finance Forum di 7 te 11 di
òktober na Bruselas pa e Paisnan i Teritorionan Ultramar. E Foro tabata den signo di
finansiamentu di medidanan preventivo i e adaptashonnan nesesario pa e Paisnan i
Teritorionan Ultramar pa motibu di kambio di klima (mitigashon i adaptashon).
Prinsipalmente islanan ta vulnerabel pa e efektonan di kambio di klima. Pa e motibu akí
tur Pais i Teritorio Ultramar ta traha riba mehorashon di nan resistensia kontra influensia
di kambio di klima. Boneiru tambe a pone sierto pasonan pa loke ta trata e tópiko
kompleho akí. A prepará e Mesa di Klima i durante e añanan tras di lomba a tuma
medidanan preventivo, manera kambio pa energia bèrdè i protekshon di kosta, manera
konstrukshon di kloaka i rekuperashon ekológiko di palu di mangel i koral. Sinembargo te
ainda medidanan adaptivo na tur Pais i Teritorio Ultramar ta den un fase inisial i nan tin
mester di e invershonnan nesesario.
E Foro a brinda un imágen klarito di e posibilidatnan i imposibilidatnan finansiero públiko i
privá, i e Paisnan i Teritorionan Ultramar a kompartí nan eksperensianan i ‘best practices’.
E problemanan ku e Paisnan i Teritorionan Ultramar ta eksperensiá na momentu di
rekoudá fondo ta komparabel. Meskos ku Boneiru, hopi Pais i Teritorio Ultramar por
ehèmpel no por hasi fiansa serka sektor privá. E oradornan na e Foro tabata prosedente
di e Paisnan i Teritorionan Ultramar (inkluso e Paisnan i Teritorionan Ultramar britániko), e
estadonan miembro enbolbí (Hulanda, Fransia i Reino Uní) i organisashonnan finansiero,
manera European Investment Bank, Caribbean Investment Bank, Banko Mundial, Fondo
Monetario Internashonal i intermediadónan privá manera OutRigger i ODI. Señora
Balentien di WEB a duna un presentashon tokante e medidanan ku WEB a tuma pa loke
ta trata suministro di awa i koriente i e desafionan pa futuro.
Komishon Oropeo a pone fondonan disponibel pa yuda e Paisnan i Teritorionan Ultramar
ku finansiamentu di e medidanan di kambio di klima i ku interkambio di informashon i ‘best
practices’ entre e Paisnan i Teritorionan Ultramar. Tambe nan a hasi palabrashon tokante
futuro kolaborashon di e Paisnan i Teritorionan Ultramar pa loke ta trata e tópiko
importante akí. E delegashon di Boneiru a konsistí di diputado Clark Abraham (alabes
Territorial Authorized Officer pa Boneiru na Union Oropeo), Joanne Balentien-Nicastia
(WEB), Reynold Oleana (presidente di Mesa di Klima Boneiru) i Gert Bogers (Punto
Sentral na Union Oropeo pa Boneiru).
Durante e Foro deliberashonnan adishonal a tuma lugá entre e Paisnan i Teritorionan
Ultramar hulandes tokante e futuro kolaborashon ku e Paisnan i Teritorionan Ultramar i e
Asosiashon di Paisnan i Teritorionan Ultramar di Union Oropeo (OCTA) bou di presidensia
di Aruba. E di 20 Foro di e Asosiashon di Paisnan i Teritorionan Ultramar di Union Oropeo
ta tuma lugá otro aña na Oropa.
Diputado Abraham, den un kòmbersashon bilateral ku representantenan di Komishon
Oropeo, a papia tokante algun tema riba kua den futuro ku prioridat por tuma lugá
kolaborashon entre Boneiru i Union Oropeo. Nan a papia tokante maneho di hubentut,
digitalisashon, kambio di klima i sargassum. E delegashon di Boneiru a hiba
kòmbersashon tambe ku organisashonnan di gobièrnu hulandes ku ta sòru pa maneho di
awa den sierto áreanan, e asina yamá ‘waterschappen’, pa un kolaborashon ku ta mas a
base di proyekto.