Boneiru ta un isla kaminda hopi turista ta bini. Nos mes no ta produsí hopi, pero nos ta kumpra hopi sí. I esaki tur bishitante i turista ku bini akí tambe ta hasi. Mayoria kos ku nos kumpra, nos tin ku importá promé. Djis pensa tokante esaki un ratu. Pasobra tur loke nos importá, sea tardi òf tempran ta resultá na lèntfel. No solamente e empakenan. Pero e produktonan mes tambe. Tan pronto ku nos tira nan afó. Tur dia ta bini hopi desperdisio aserka. Pa redusí esaki Nashonnan Uní a proklamá 30 di mart komo ‘Dia internashonal liber di desperdisio’.
Tur dia nos ta tira tur sorto di kos afó: plèstik, sobrá di kuminda, karton, glas, paña, un mesa bieu, djis sigui menshoná numa. Pa nos esaki ta desperdisio, nos no ke nan mas. Tur siman Selibon ta pasa buska nan nèchi asina pa nos i nan ta tira nan riba un monton grandi. Esaki nos ta hasi pa desénas di aña kaba asina. Nos lèntfel ta birando kada biaha mas grandi i mas haltu. Esaki ta malu pa nos ambiente di biba. Pensa ku de fakto nos por usa 70 porshento di nos desperdisio atrobe komo materia prima. Den teoria nos por separá e desperdisio akí, di manera ku nos por usa e materianan prima di nobo. Zeta bieu di motor i zeta bieu ku nos a kushiná kuné, nos por konbertí den biodisel.
Na nos isla ya kaba ta posibel pa traha produkto nobo ku plèstik bieu. Di un banda pues nos tur huntu ta okashoná bastante hopi desperdisio. Di un otro banda, pa nos komo isla chikitu mayoria biaha e desperdisio ta muchu tiki pa us’é komo materia prima di nobo den un forma ku ta ekonómikamente rendabel. Tòg tin sierto oportunidatnan sí. Nos no por konbertí nos shushi di kurá den kòmpòst? Nos no por mula glas hasié pipita chikitu ku nos por usa den konstrukshon (di kaminda) na lugá di santu?
Tin diferente manera pa anda den un forma inteligente ku produkto. Òf ku kosnan ku nos ke tira afó. Bo por usa ménos kos, usa nan mas tantu tempu òf usa nan di nobo. Usa solamente loke realmente bo tin mester. Sòru bon pa bo kosnan, pa medio di mantené nan bon, drecha nan òf renobá nan. Tira kos di tal manera afó, ku nos por bolbe usa e materialnan. Pues purba na promé lugá pa konsumí ménos i usa bo kosnan pa mas tantu tempu. Di e manera ei bo ta kontribuí na un ambiente liber di desperdisio i bo ta partisipá na e Dia Sin Desperdisio! I kòrda: kada dia por ta un dia sin desperdisio!