Na Boneiro pa celebra lesamento y bon uzo di idioma Biblioteca Publico Boneiro ta regala buki durante dos dia, cuminsando riba dia 8 di september cual ta Dia di Alfabetismo.
Riba dia 8 di september por pasa entre 08:00or pa 16:30or y riba dia 9 di september por pasa entre 08:00or y 11:30or na Kaya Gramèl z/n. Durante e 2 dianan aki tur hende ta bon bini pa pasa na biblioteca y scoge den un variacion amplio di buki y nan por bay cu un maximo di 5 buki pa persona. Lo tin buki disponibel pa tur edad y na 4 idioma (papiamento, Hulandes, Spaño y Ingles).
Maneho di biblioteca ta responsabel pa e coleccion di buki keda optimal, atractivo y tambe interesante pa tur lesado. Esaki ta trece cu n’é cu mester saca coleccion bieu pa asina nobo por drenta. Na e momento aki, biblioteca ta drechando su coleccion di buki y esaki ta e motibo di e regalo bunita aki riba un dia asina special.
E team di biblioteca ta spera di mira hopi lesado y futuro lesado pasa y haci uzo di e oportunidad aki pa asina cultiva lesamento aki na Boneiro. Por uza e momento aki tambe pa bira miembro di biblioteca of fia buki. Por haña mas informacion riba nos pagina di facebook ‘Biblioteca Publico Boneiro’ y tambe por tuma contacto cu Biblioteca publico via 715-5344 of por bishita biblioteca na kaya Gramèl z/n.
1 comment
[…] Source link […]