Gran parti di e confusion cu tin actualmente rond di supervision financiero ta danki na e partidonan tradicional. Ambos partido ta contra Raft, pero na mesun momento nan ta pro supervision financiero cu por termina den un aanwijzing for di Den Haag. Pa e parlamentario independiente tin un motibo pakico ni MEP, ni AVP tin un posicion defini. Pasobra ta hopi cla cu pa 37 aña, ambos a hiba un mal maneho financiero.
Como ehempel Santos do Nascimento ta duna Centrale Accountantsdienst (CAD), un departamento cu 1986 tabatin como 25 empleado, mientras cu awe tin menos cu mita di esey. E departamento ta mas zwak cu nunca. Ta lanta e pregunta di ken a debilita e departamento aki; y den mesun tiro, departamento di finanzas cu henter e sistema di ambtenaar?
E calidad di funcionario publico tambe a bay atras. Ora bo mira con na inicio di Status Aparte e ambtenaar tabatin un bon dominio di idioma Hulandes, awendia bo ta mira hopi cu no por compronde of skirbi e idioma satisfactoriamente. Tin un falta grandi di capacidad y experticio. Esaki ta un di e aspecto cu a laga Hulanda perde respet pa Aruba.
Ora cu Hulanda ta palabra un deadline cu nos politico y e fecha ta yega y nos no por cumpli, e excuus ta cu nos no tin capacidad y kier punta dede riba Boneiro, Corsou y St. Maarten, mientras ta lubida cu na 2015, e supervision a bin Aruba strobando politico di haci e debe mas grandi di loke e ta. Y asina mes ta pretende cu CAft no ta traha y cu RAft tampoco lo traha. Ta danki e na poco supervision financiero, awendia tin documento riba e website di CAft cu informacion financiero cu no tabatin nunca prome. Minister di Finanzas ta pronk cu tin uitvoeringsrapportage si, pero esey tambe ta danki na e supervision financiero. Si no ta p’esey, no lo tin ni cuenta anual ni rapport di ehecucion tampoco. No ta normal cu un pais cu ta genera 1 biyon florin pa aña no por duna un bon cuenta di unda placa ey ta bay.
AVP kier bin cu un Sociaal Cultureel Plan Bureau hustamente pasobra nan no kier supervision financiero y ta pensa e Bureau aki lo neutralisa CFT. “AVP no ta kere den un bon administracion financiero, pero si den mercadeo cu yen potret. Nan no ta kere den disciplina fiscal, esey ta e realidad y p’esey ta bin cu e idea aki, mescos cu a bin cu e idea di Paul Krugman, mescos cu a bin cu e idea di e Bon Comun. No pasobra ta kere den e Bon Comun, of den Paul Krugman, pero pasobra kier gasta placa sin cu tin control,” e parlamentario ta enfatisa. Pueblo mester compronde cu ni AVP, ni MEP ta gusta un bon administracion financiero pasobra ora bo administracion ta malo, bo tin chens di haci corupcion sin cu tin prueba. Ora bo tin corupcion ta reina den bo pais, e ora ey pobresa tambe ta reina. Esey ta e realidad di e pais aki na berde cu geel.
