Partido di pueblo Arubano (AVP) ta e di dos partido di mas grandi na Aruba. Lider di partido AVP Mike Eman ta gradici tur su votadonan debi cu e circunstancianan cu partido AVP mester a supera pa ta para awe despues di eleccion di ta un di e partidonan grandi y fuerte tabata un sentimento sumamente grandi y esey ta debi na e amor y na e forsa grandi di e partido. Segun lider di AVP nan ta cla para pa cuminsa e proceso pa AVP denter di corto ta e partido di mas grandi di Aruba bek. Segun Eman e trabaonan ta cuminsa awe.
E parti importante den henter e proceso aki ta cu Aruba ta enfrentando retonan grandi y ta mira un tempo hopi dificil pa Aruba su dilanti. Segun Lider di AVP Mike Eman partido AVP a incorpora den su lista, programa y pensamento nan di hendenan cu por a atende cu e reto grandi cu Aruba ta enfrentando na e momentonan aki. AVP tin e programa y ta sinti cu partido AVP tin un rol hopi importante pa hunga den e periodo nos dilanti.
Riba e lista di AVP a incorpora un gran cantidad di potencial di hoben y cu e potencial nan di e hobennan aki ta mira un crecemento pa e partido den futuro. Esaki kiermen den tur sentido un periodo di eleccion cu no tabata facil, pero a traha duro y a bataya duro y awe por bisa e pueblo Arubano cu AVP ta haci un evaluacion di e situacion manera cu e ta.
Segun Eman ,AVP tey pa sirbi Aruba y kier ta e partido pa rescata Aruba. AVP a prepara pa rescata Aruba y nada no ta cambia den esey. Segun lider di AVP e necesidad pa rescata Aruba ta keda mes cos y na e momentonan aki ta momentonan pa mira den ki forma partido AVP lo duna su aporte pa e plan di rescate .
Lider di AVP Mike Eman ta felicita e partidonan cu a haya asiento cu ta partidonan nobo cu a haya asiento y sigur esey ta elogio. Un pabien na cada un di e partidonan aki cu den nan forma a aporta na e proceso di e campaña electoral aki .
Segun lider di AVP nan tey pa traha duro pa asina denter di corto ta atrobe e partido di mas grandi di Aruba. Na e momentonan aki ta importante pa partido AVP bay evalua den su seno, importante ta e evaluacion interno cu e partido mester haci. AVP a prepara su mes pa e rescate di Aruba, e team tey e plan tey.
